ՄԱԿ -ում Իրանի դեսպան. «Իսրայէլը պատասխանատու է Իրանի դէմ միջազգային բոլոր սխալ գործողութիւնների համար»
«ԱԼԻՔ» – Իսրայէլը պատասխանատու է Իրանի դէմ միջազգային բոլոր սխալ գործողութիւնների համար եւ պէտք է պատասխանատւութեան ենթարկւի։ Այս մասին յայտարարել է ՄԱԿ-ում Իրանի դեսպան եւ մշտական ներկայացուցիչ Ամիր Սաիդ Իրաւանին։
Նա նամակ է յղել ՄԱԿ-ի գլխաւոր քարտուղար Անտոնիօ Գուտերեշին, ինչպէս նաեւ ՄԱԿ-ում Ֆրանսիայի դեսպանին՝ որպէս Անվտանգութեան խորհրդի նախագահողի՝ ընդգծելով միջազգային հանրութեան, յատկապէս ՄԱԿ-ի Անվտանգութեան խորհրդի վճռական գործողութիւնների անհրաժեշտութիւնը՝ ի պատասխան Իսրայէլի ահաբեկչական եւ տարածաշրջանն ապակայունացնող գործողութիւնների, յատկապէս նրա շարունակական բարբարոսական յանցագործութիւնների պաղեստինցիների դէմ Գազայի հատւածում եւ Յորդանան գետի արեւմտեան ափում։
Նա շեշտել է, որ միջազգային կառոյցների համաչափ եւ համարժէք արձագանգն անհրաժեշտ է, քանի որ Իսրայէլի գործողութիւնները լուրջ սպառնալիք են տարածաշրջանային եւ համաշխարհային խաղաղութեան եւ անվտանգութեան համար:
ՄԱԿ-ում Իրանի Իսլամական Հանրապետութեան ամենաբարձրաստիճան դիւանագէտը յստակեցրել է. «Իրանի Իսլամական Հանրապետութիւնն ընդգծում է իր օրինական եւ բնածին իրաւունքները, որոնք ամրագրւած են միջազգային օրէնքներով եւ ՄԱԿ-ի կանոնադրութեամբ՝ վճռականօրէն արձագանգելու Իսրայէլի վարչակազմի կողմից ցանկացած սպառնալիքի եւ անօրինական գործողութեան։ Իրանը նաեւ ընդգծում է այդ իրաւունքների իրականացման վճռականութիւնը՝ պաշտպանելու իր անվտանգութիւնը, ազգային շահերը եւ մարդկանց՝ ցանկացած սպառնալիքից կամ յարձակումից»։
