Մալխաս Ամոյեանը յաղթեց թուրք ըմբիշին եւ հռչակւեց Եւրոպայի եռակի չեմպիոն

Ռումինիայի մայրաքաղաք Բուխարեստում անցկացւող յունահռոմէական ոճի ըմբշամարտի Եւրոպայի առաջնութիւնում Հայաստանի հաւաքականի առաջատարներից Մալխաս Ամոյեանը երրորդ անգամ նւաճեց Եւրոպայի չեմպիոնի տիտղոսը:

Աշխարհի չեմպիոն, Փարիզի Օլիմպիական խաղերի ուղեգիր նաճած Մալխաս Ամոյեանը 77 կգ. քաշային կարգի եզրափակիչում գօտեմարտեց Եւրոպայի կրկնակի փոխչեմպիոն թուրք Իւսուն Էմրէ Բաշարի հետ:

Առաջին մրցափուլում գորգի մրցավարը պասիւութիւն տւեց թուրք ըմբիշին: Մալխաս Ամոյեանին յաջողւեց պարտերից պոկել մրցակցին գորգից, բայց չգլորեց: Հայաստանի հաւաքականի մարզիչները բողոքարկեցին: Մրցավարները բաւարարեցին եւ հաշիւը դարձրին 2:0: Երկրորդ մրցափուլում Ամոյեանը հաշիւը դարձրեց 6:0: Բաշարը բողոքարկեց, բայց մրցավարները չբաւարարեցին: Հաշիւը դարձաւ 7:0: Գօտեմարտի աւարտից 30 վայրկեան առաջ թուրք ըմբիշն արդէն յանձնւել էր եւ այլեւս չէր պայքարում:

Ամոյեանն ու Բաշարը նախորդ անգամ հանդիպել էին 2023 թւականի Եւրոպայի առաջնութեան կիսաեզրափակիչում, որտեղ Եւրոպայի եռակի չեմպիոնը 6:1 հաշւով յաղթել էր թուրք ըմբիշին:

Մալխաս Ամոյեանը մեկնարկել էր 1/8 եզրափակիչից, որտեղ 10:1 հաշւով տպաւորիչ յաղթանակ էր տարել Իտալիայի ներկայացուցիչ Ռիկարդօ Վիտօ Աբրեսցիայի նկատմամբ: Քառորդ եզրափակիչում 3:2 հաշւով պարտութեան էր մատնել ռուսաստանցի Ադլետ Տիւլուբաեւին: Կիսաեզրափակիչի 2:1 հաշւով առաւելութեան էր հասել մոլդովացի Ալեքսանդրին Գուտուի նկատմամբ:

24-ամեայ Ամոյեանը Եւրոպայի չեմպիոն է դարձել նաեւ 2022 եւ 2023 թւականներին:

2023 թւականի սեպտեմբերի 22-ին Սերբիայի մայրաքաղաք Բելգրադում անցկացւած աշխարհի առաջնութիւնում Ամոյեանը երկրորդ անգամ դարձաւ բրոնզէ մեդալակիր եւ նւաճեց իր մարզական կարիերայի առաջին Օլիմպիական խաղերի ուղեգիր:

Մալխաս Ամոյեանը 24 տարեկան է: Ծնւել է 1999 թւականի յունւարի 22-ին Երեւանում: 72 կգ. քաշային կարգում աշխարհի չեմպիոն է, 77 կգ. քաշային կարգում աշխարհի կրկնակի բրոնզէ մեդալակիր, աշխարհի անհատական գաւաթի խաղարկութեան արծաթէ մեդալակիր է, աշխարհի Մ23 չեմպիոն է: Ամոյեանը Պեկին-2008-ի Օլիմպիական խաղերի բրոնզէ մեդալակիր, աշխարհի փոխչեմպիոն, աշխարհի առաջնութեան կրկնակի բրոնզէ մեդալակիր, Եւրոպայի կրկնակի չեմպիոն, քառակի փոխչեմպիոն, յունահռոմէական ոճի ըմբիշ Ռոման Ամոյեանի եղբօրորդին է:

Sport.news.am