Յեղափոխութեան 45-ամեակը նշւեց Ատրպատականի հայոց թեմի կազմակերպութեամբ ազգային առաջնորդարանի «Համազասպ Ոսկանեան» սրահում

Ատրպատական, ազգային առաջնորդարան, Թաւրիզ – Շաբաթ, փետրւարի 10-ին, ժամը 18:30-ից 21:30-ը, Ատրպատականի հայոց թեմի ազգային առաջնորդարանի «Համազասպ Ոսկանեան» սրահում տեղի ունեցաւ Իրանի Իսլամական յեղափոխութեան 45-ամեակին նւիրւած, թեմի գլխաւոր գեղարւեստական ծրագիրը, մասնակցութեամբ թաւրիզահայ կեանքում գործող բոլոր միութիւնների եւ կազմակերպութիւնների եւ կրթական հաստատութիւնների։

Հովանաւորութեամբ եւ նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի եւ Թեմական խորհրդի, սոյն ծրագրին յատկապէս ներկայ գտնւեցին Թեհրանից ժամանած Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, ինչպէս նաեւ ԻԻՀ-ում ՀՀ դեսպանատան խորհրդական Գրիգոր Մելքոնեանը:

Պետական հիւրերի շարքում էին Թաւրիզի քաղաքապետ ճրտպ. Հուշեարը, Թաւրիզի քաղաքապետական աւագանու նախագահ դոկտ. Բեջանին, ինչպէս նաեւ նոյն կազմի անդամ հոջ. Բերգին, Փոքրամասնութիւնների գրասենեակի պատասխանատուներ՝ Հեմաթին եւ Մուսաւին, «Վադիէ Ռահմաթ» գերեզմանատան նահատակաց շիրիմների պատասխանատու հոջ. Ֆարոխին, Թաւրիզի Ուսումնադաստիարակչական հիմնարկութեան տնօրէն հոջ. Հոսէյնզադէն, հայ նահատակների նւիրւած նորատիպ գրքի հեղինակ՝ Մասումէ Ջաֆարզադէն, Երիտասարդութեան եւ մարզա-մշակութային հիմնարկութեան ներկայացուցիչ՝ Նաւային, Նահատակաց հիմնարկութեան տնօրէն Սալամին, Ջուլֆայի Ազատ գօտու անվտանգութեան տնօրէն դոկտ. Աշրաֆին, Թաւրիզի Փեթրոշիմի ընկերութեան տնօրէն՝ դոկտ. Միրաշրաֆին, ինչպէս նաեւ մի շարք քաղաքական հրաւիրեալներ: Հանդիսութեան ներկայ էին նաեւ հայ նահատակների ընտանեկան անդամները եւ ազատորդիները:

Հանդիսավար Կարօ Ջորջեանը կատարեց բացման խօսքը: Թեմական խորհրդի խօսքը ներկայացրեց ատենապետ Գագիկ Ջորջեանը, շնորհակալութիւն յայտնելով Ատրպատականի բոլոր պետական կառոյցներին, որոնք միշտ զօրավիգ են կանգնում ազգային առաջնորդարանի գործունէութեանը, համայնքի գոյութեանն ու բարգաւաճմանը անվերապահ օժանդակութիւն ցուցաբերելով:

Իր պաշտօնական խօսքով դոկտ. Արա Շահվերդեանը ողջունեց ներկաներին, առաջիկայ ընտրութիւնների եւ պետական բոլոր ծրագրերին հայ ժողովրդի մնայուն մասնակցութիւնը շեշտելով:

Ներկայ հրաւիրեալների անունից շնորհաւորանքի եւ քաջալերանքի խօսք արտասանեց քաղաքային աւագանու անդամ հոջ. Բերգին: Գովեստի արտայայտութիւններով նա դրւատեց թաւրիզահայ համայնքի աշխոյժ ներկայութիւնը քաղաքում, կրօնական, ազգային եւ Իրանական հայրենիքի կապւածութիւնը, գլխաւորութեամբ Սրբազան Հօր:

Բեմ հրաւիրւեց Սրբազան Հայրը, որը թուրքերէն լեզւով ողջունելով բոլոր հիւրերին, վեր հանեց օրւայ հաւաքին կարեւոր նշանակութիւնը հայ համայնքի հաւատարմութեան, եւ երկրի բարգաւաճման մասնակից լինելու արտայայտութիւն համարեց սոյն ծրագիրը, ասելով. «Իրանում մենք բոլորս մէկ ընտանիքի անդամներ ենք: Հակառակ մեր կրօնական ու ազգային տարբերութիւններին, մէկ-մէկ ճակատով ներկայանում ենք թշնամուն»,- ասաց Սրբազան Հայրը, յարգելով յիշատակը բոլոր նահատակներին, ե՛ւ հայ, ե՛ւ տեղացի, որոնք Իրանական հայրենիքի համար զոհւեցին: Սրբազան Հայրը անդրադարձ կատարեց Գազայում ներկայ ժամանակներին տեղի ունեցող սպանդին, սիոնիստական պետութեան կործանարար զէնքով, որի հետեւանքով բազմաթիւ անմեղ զոհեր են ընկնում ամէն օր. «Այս տարի, որ 45-ամեակն է յեղափոխութեան, ուրախութեանս միախառնւած է տրտմութիւն, ցաւ, երբ Գազայում անմեղ ժողովուրդ է ցեղասպանւում, եւ դեռ ինչքա՜ն որբեր ու անտուն մարդիկ կան, ինչպէս նաեւ ընդհանուր անորոշութիւն տարածաշրջանում: Թող Աստւած անսասան պահի Իրանի Իսլամական Հանրապետութիւնը, իր կրօնական մեծ առաջնորդ այաթ. Խամենէիի հովանաւորութեամբ»,- ասաց Սրբազան Հայրը:

Սրբազան Հօր պատգամի պարսկերէն թարգմանութիւնը ընթերցւեց Թեմական խորհրդի անդամ Ալէն Սայեադեանի միջոցով, որտեղ աւելի լայն արտայայտւել էր նա, յատկապէս Գազայում տեղի ունեցող անմարդկային կոտորածին, սիոնիստական կա­ռավարութեան ձեռքով:

Ծրագրի ընթացքում ելոյթ ունեցաւ «Կոմիտաս» երգչախումբը, ղեկավարութեամբ երաժիշտ Վարդան Վահրամեանի, իսկ Թաւրիզի հայոց դպրոցի մանկապատանեկան երգչախումբը խմբերգեր կատարեց, ղեկավարութեամբ Վահիկ Բարոյեանի: «Ալիք»-ի Թաւրիզի մասնաճիւղի անունից ուղերձ կարդաց Մոնթէ Դիլանեանը, իսկ Թաւրիզի Հայ Համալսարանական միութեան վարչութիւնից ասմունքով ելոյթ ունեցաւ Փաթրիշիա Դանղեանը: Նոյն կազմից Թադէ Նազարբէգեանը դաշնամուրի վրայ դասական երաժշտութիւն նւագեց, իսկ Հ.Մ.Ա.Կ.-ի Թաւրիզի մասնաճիւղի կազմից դոկտ. Յովիկ Գալստեանը եւ Միրօ Աբրահամեանը մեներգերով հանդէս եկան, երգեհոնի ընկերակցութեամբ Կարէն Սարգսեանի:

Ծրագրի ընթացքում բեմ բարձրացաւ Էրշադի «Աքիլա» երգի եւ նւագի համոյթը, որը յատկապէս «Սարի աղջիկ» երգի կատարումով եւ նւագարանային ճոխ ներ­կայացումներով մեծ տպաւորութիւն թողեց ներկաների վրայ:

Աւար­տին պետական հիւրերի գլխաւորները բեմ հրաւիրւեցին եւ Սրբազան Հօր հետ միասին գնահատեցին նահատակների ընտանիքներին յատուկ նւէրներով, տրամադրւած դոկտ. Արա Շահվերդեանի կողմից: Թաւրիզի քաղաքապետը յատուկ յուշանւէրներով պարգեւատրեց Սրբազան Հօրը եւ Թեմական խորհրդի ատենապետին, իսկ Թեմական խորհուրդը արծաթեայ նւէրներով պարգեւատրեց բարձրաստիճան հիւրերին: Քաղաքային խորհուրդը յատկապէս յիշեց ազգային առաջնորդարանի նւիրեալ պաշտօնեայ հանգուցեալ Վիգէն Սարգսեանին, նրա լուսանկարը նւիրելով որդուն՝ Վարդանին: Նշենք, որ Թաւրիզի եկեղեցիների Խնամակալ մարմինը հանդիսութեան դադարներին հիւրասիրեց բոլոր ներկաներին: