ԻԻՀ Յեղափոխոիթեան 46-րդ տարեդարձի ներքին ձեռնարկներ՝ Ատրպատականի հայոց թեմում (2025 թ.)

Ատրպատականի հայոց հնագոյն թեմում ապրող մեր ժողովրդի քաջարի զա­ւակ­­ները, իբրեւ Իրանի Իս­լամական Հանրապետութեան հաւատարիմ քաղաքացի­ներ, 46 տարիներ ա­ռաջ, Յե­ղափո­խութեան մեծ առաջնորդ Այաթ. Իմամ Խո­մէյնիի իրագործած Իսլամական շարժ­ման տօնակատարութիւններին մաս­նա­կից դարձան, միութիւնների եւ կազ­մա­կերպութիւնների կողմից գործադրւած ներքին ծրագ­րերով, բոլորը նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի: Նշենք, որ առաջնորդ Սրբազանը բոլոր ծրագրերին նա­խա­գահեց եւ իր պատգամը յղեց տօնի առիթով: Ստորեւ հակիրճ տեղեկութիւն՝ վերոնշեալների մասին:

1) Շաբաթ, 1 փետրւար, 2025

Առաւօտեան ժամը 9:33-ին, ղօղան­ջեցին հայոց եկեղեցիների եւ դպրոցների զան­գերը, Թաւրիզում եւ Ուրմիայում, ի յուշ՝ Յե­ղա­փո­խութեան հիմնադիր՝ Էմամ Խոմէյ­նիի Իրան վերա­դարձի։ Տա­րի­ների աւանդութիւն դարձած սոյն յարգանքը, տեղացի ժո­ղո­վրդի կող­մից եւս միշտ բար­ձր է գնահատւում, երբ հայ եկեղեցիների զան­գերի ղօղանջը լսելով, քրիստոնեայ-իսլամ եղբայրութիւնը եւ մէկ հայրենի­քի պատկանե­լու­թիւնը վերաթարմանում է բոլորի մտքում:

2) Կիրակի, 2 փետրւար, 2025

Առաւօտեան ժամը 10-ին, Թաւրիզի հայոց Ազգ. «Թամարեան, Հայկազեան եւ Սահակեան» դպրոցի սրահում տեղի ունեցաւ աշակերտական ցուցահանդէս: Սեղանի վրայ ցուցադրւել էին աշակերտութեան ձեռքի աշխատանքները հանդիսացող իրեր, որոնք արդի աշխարհի գիւտերի հետեւողականութիւն ունէին: Առաջնորդ Սրբազանը բարձր գնահատեց տեսչութեան կազմակերպութեամբ տեղի ունեցած ձեռքի աշխատանքների գործերը, որոնք աշակերտութեան երեւակայութիւնը, ինչպէս նաեւ հնարամտութիւնը ճոխաց­նում են, եւ պատրաստում նրանց ապագայ կեանքին:

Յայտնենք, որ տասնօրեակի ընթացքում դպրոցում տեղի են ունենում  բազմաթիւ այլ ծրագրեր՝ գիտական եւ մարզական մրցութիւններ, նաեւ այցելութիւններ գիտական եւ մշակութային գեղարւեստական կենտրոններ:

Ժամը 11-ին, Լիլաւայի Ս. Սարգիս եկեղեցում մատուցւած Ս.Պատարագի ընթաց­քին առաջնորդ Սրբազանը քարոզեց, անդրադառնալով Իրանում տեղի ունեցած մեծ յեղափոխութեան, հասարակաց կեանքի ազատութեան սկզբունքին, խաղաղութիւն մաղթելով համայն աշխարհին:

2) Երկուշաբթի, 3 փետրւար, 2025

Երեկոյեան ժամը 6-ին, Թաւրիզի հայ համալսարանականների միութեան կազ­մակերպութեամբ տեղի ունեցաւ նկարչութեան եւ ձեռքի աշխատանքների ցուցահանդէս, Առաջնորդարանի «Հ. Ոսկանեան» սրահում: Թաւրիզահայ երեխաներ, որոնք Համալսարանականների միութեան կազմակերպած դասարաններին են հետեւում 15 հոգով, ուսուցչուհի ունենալով արւեստագէտ նկարչուհի Փոլետ Բենոյեանին, իրենց գործերն էին ցուցադրել սրահում: Բոլորի գործերը Սրբազան Հօր պաշտօ­նա­կան գնահատականի եւ այ­ցելուների քաջալերական արտայայտութիւններին ար­ժա­նացան: Սրբազան Հայրը մեծապէս գնահատեց ծնողներին եւ Համալսարանականնե­րի միութեան վարչութեան, երեխաների մօտ արւեստի աստւածատուր ձգտումները զարգացնելու համար:

3) Երեքշաբթի, 4 փետրւար, 2025

ա)- Երեկոյեան ժամը 5.30-ին նախաձեռնութեամբ ՀՕՄ-ի Թաւրիզի մասնաճիւղի, տեղի ունեցաւ թէյասեղան, կենտրոնատեղիի  սրահում:  Յեղափոխութեան  տօնի եւ դրա պատմական տւեալների մասին դասախօսեց «Ծերունի Գասպարեան» կրթարա­նի ուսուցչակազմի անդամ՝ Կարէն Սարգիսեանը: Անցեալն ու ներկան միմեանց առնչելով, առաւել փայլուն ապագայի յոյս յայտնեց նա, երկրի անսասանութեան եւ նոր ծրագրերի համար բարեմաղթութիւն կատարելով: Աւարտին, Սրբազան հայրը գնահատեց կազմակերպողներին, եւ ներկայ աշխարհի արհաւիրքին անդրադարձաւ, յոյս յայտնելով, որ խաղաղութիւնը կը յաղթանակի:

բ) – Նոյն օրը երեկոյեան ժամը 7-ին, Հ.Մ.Ա.Կ.-ի Թաւ­րիզի մասնաճիւղում, Վար­չութ­եան կազմա­կեր­պութեամբ տեղի ունե­ցաւ սեղանի թենիսի մրցա­շար, Յեղափոխութ­եան 46-ամեակի առիթով: Մրցաշար­ը տեղի ունեցաւ մասնաճիւղի կենտրո­նա­տե­ղիում, եր­­կու զոյգ մրցակիցներով, որի աւարտին վար­չու­թ­իւնը պար­գեւատրեց յաղ­թա­կան­ներին:

4) Չորեքշաբթի, 5 փետրւար, 2025

Երեկոյեան ժամը 6-ին, ազգային առաջ­նորդարանի «Ռոստոմ-Գասպար» գրադա­րանի կազմա­կեր­պութեամբ տեղի ու­նե­ցաւ դա­սախօսութիւն «Հեքիաթների ընթերցում եւ վերլուծում,  ու  նկարչութիւն»  նիւթով:  Բացման խօսքում, Շարա Բաղդասարեանը անդրադարձաւ 46-ամեակի յեղափոխութեան ճանապարհին, իսկ Իզաբէլ Սարգիսեան եւ Շարիս Վարդանեան պարսկերէն լեզւով վերաքաղը կատարեցին անցած տարինե­րի պատմութեան: Ապա Անտրու Մկրտիչեանի կողմից ցուցադրւեց ամփոփ ֆիլմ, երկրի պատերազմական իրավիճակի անցեալը ներկայացնող, յատկապէս պատրաստ­ւած նոր սերնդի դաստիարակութեան համար:

Տեղի ունեցաւ մանկա-պատանեկան նկարչութիւն, երբ ներկայ երեխաները նոր դիտւած ֆիլմից պատկերներ նկարեցին, եւ գնահատւեցին: Սրբազան հայրը գնահա­տեց մասնակիցներին եւ օրւայ նիւթին հաղորդակից դարձրեց նոր սերնդին: