Երկուշաբթի` մայիսի 27-ին Թեհրանի հայոց թեմի Թեմական խորհրդի հրաւէրով, համատեղ հանդիպում կայացաւ Կրթական խորհրդի եւ թեմի հայկական դպրոցների հայ տեսուչ-տեսչուհիների եւ փոխտեսուչ-փոխտեսչուհիների հետ:
Հանդիպման հիմնական օրակարգն առնչւած էր ազգային եւ հոգեւոր կեանքում դպրոցական աշակերտութեան եւ ընդհանրապէս երիտասարդութեան մասնակցութեան հետ կապւած մտահոգութիւններին ու մարտահրաւէրներին, որն այդ լոյսի ներքոյ տեղի ունեցաւ խորհրդակցութիւն՝ ազգային ոգին արմատաւորելու եւ այդ ուղղութեամբ հետաքրքրութեան շարժառիթ ստեղծելու նորօրեայ ձեւաչափերի մշակման անհրաժեշտութեան շուրջ:
Հանդիպման սկզբին, Թեմական խորհրդի ատենապետ ճրտպ. Նորայր Արամեանը իր ատայայտութիւնների հիմնական առանցքը դարձրեց հայկական դպրոցը, որը հայ եկեղեցու, միութիւնների եւ հայ ընտանիքի հետ, որպէս չորս կարեւոր հիմնասիւներ կազմում են գրաւականը գոյատեւման եւ կրօնական ու ազգային արժէքների պահպանման: Նա ընդգծեց, որ հայկական դպրոցների կարեւոր առաքելութիւնն է նոր սերնդին ազգային ու հոգեւոր արժէքներով շաղախել, մեր ազգի անցեալի ու ներկայի յատկանշական դէպքերին, դէմքերին ու մարտահրաւէրներին ծանօթացնել եւ հայ կեանքին գործօն մասնակցութիւնը բերելու եւ ծառայելու ոգին ներշնչել:
Խորհրդակցութեան ընթացքին արծարծւեցին տեսակէտներ եւ առաջարկներ ապագայ ծրագրերի մշակման վերաբերեալ: Այս ուղղութեամբ նախ կարեւորւեց միութիւնների դերակատարութիւնը, երիտասարդութեան ներգրաւման եւ աշխատանքներում միջամուխ դարձնելու գործընթացում իսկ ամենաբացասական կէտերը համարւեցին կրկնութիւնն ու նորարարութեան բացակայութիւնը, որոնք հետաքրքրութեան շարժառիթը նւազեցնելու պատճառ են հանդիսանում: Ընդգծւեց երիտասարդ-երիտասարդուհիների մասնակցութեան համար լուրջ կազմակերպւածութիւն, հաւաքական աշխատանք ու հետեւողական գործընթաց ունենալու անհրաժեշտութիւնը եւ վերաշեշտաւորւեց հայ դպրոցի մարդակերտումի ու հայակերտումի առաքելութիւնը։
Ազգային առաջնորդարանի Հանրային կապի գրասենեակ
