«ԱԼԻՔ», ՀԱՏԻՍ – Յունիսի 27-ին, Հ. Մ. «Սիփան» միութեան Սկաուտական բաժանմունքի երդման 17-րդ արարողութեանը երդւելով՝ թաշկինակաւորւեցին նորակոչ սկաուտները, ինչպէս նաեւ գնահատագրերով եւ աստիճանի բարձրացումով գնահատւեցին իրենց ջանասիրութեամբ աչքի ընկած սկաուտները:
Հ. Մ. «Սիփան» միութեան «Նորայր Էլսայեան» մարզադահլիճում կայացած արարողութեանը սկաուտների ընտանիքների կողքին ներկայ էին նաեւ Թ. Հ. Թ. Պատգամաւորական ժողովի եւ Թեմական խորհրդի ներկայացուցիչները, սկաուտների քաւոր հանդիսացող վաստակաւոր միութենականները, եւ Սասուն քաղաքամասի քահանահայրերից Տ. Վրթանէս քհնյ. Բաբախանեանը:
Միջոցառումը մեկնարկեց բաժանմունքի մարշ-նւագախմբի ընկերակցութեամբ դրօշակակիրների մուտքով, որոնց ձեռամբ միութեան եւ բաժանմունքի դրօշները բարձրացւեցին դրօշակաձողերին:
«Սիփան»-ի ժայռամագլցման խմբի մարզիկների ձեռամբ, որոնք նոյնպէս սկաուտներ էին, դահլիճում բարձրացւեց «Բարձրացիր բարձրացուր» նշանաբանը ցուցադրող պաստառը, ապա սկաուտները ներկայացրեցին իրենց մարտական պատրաստւածութիւնն ու ճկունութիւնը:
Ընթացքում ճկուն կատարումներով հանդէս եկան կրտսեր հատւածի երգչախումբը, մարտարւեստ պարապող արենուշները, եւ շարքային կատարումներով արի-արենուշները:
Այնուհետ սկաուտները կատարեցին երդման արարողութիւն՝ վերանորոգելով ուխտը, որպէս հայկական մշակոյթի եւ վերանկախացած պետականութեան իրաւայաջորդ սերունդ, հաւատարիմ մնալու անկախութեան եւ ազատ հայրենիք ունենալու գաղափարին:
Եզրափակիչ բաժնում Սկաուտական բաժանմունքի սկաուտապետ Քարմէն Չհարմահալեանի միջոցով ընթերցւեց բաժանմունքի խօսքը, ապա ելոյթ ունեցաւ Հ. Մ. «Սիփան» միութեան վաստակաւոր սկաուտ Հայկազ Շիրւանեանը, ով սկաուտական շարժումը համարեց որպէս յանձնառու սերնդի դաստիարակման լաւագոյն եւ արդիւնաւէտ միջոցներից մէկը:
Լուսանկարները՝ ՀԱՏԻՍԻ
