Ուրմիայի պետական բարձրաստիճան գործիչները այցելեցին Ատրպատականի հայոց թեմի առաջնորդին

Ատրպատական, ազգային առաջնորդարան, Թաւրիզ – Երկուշաբթի, յուլիսի 29-ին, առաւօտեան ժամը 11:00-ին, Ատրպատականի հայոց թեմի առաջնորդ Տ. Գրի­գոր արք. Չիֆթճեանը ընդունեց Ուրմիայի շրջանից ժամանած պաշտօնական հիւրերի, որոնք եկել էին բարի գալուստ մաղթելու առաջնորդ Սրբազան Հօր: Հիւրերի սոյն խմբին մաս էին կազմում ուրմիահայ ազգային բարերար Էդիկ Մեջլումեանը, ինչպէս նաեւ Գործակալական խորհրդի ատենապետ՝ Վանիկ Յակոբեանը:

Հանդիպմանը ներկայ գտնւեցին Թեմական խորհրդի ատենապետ Գագիկ Ջորջ­եանը, անդամներ Ալէն Սայեադեանը եւ Հենրիկ Աբրահամեանը: Ազգային առաջնորդարանի «Էմիլ Յակոբեան» դահլիճում կայացած հանդիպմանը ողջունելով բոլորին, առաջնորդ Սրբազան Հայրը շնորհակալութեամբ բարի գալուստ մաղթեց բարձրաստիճան հիւրերին՝ Մշակոյթի հաստատութեան ընդհանուր տնօրէն Նորուզիին, Փոքրամասնու­թ­իւնների գրասենեակի պատասխանատու՝ Միրսադրին եւ ընդհ. փոխանորդ Իսմայիլ­զադէին, ինչպէս բարձրաստիճան անձնաւորութիւններ՝ պետական բարձրագոյն կառոյց­ներից:

Հանդիպումը առիթ հանդիսացաւ, որ թեմի արեւմտեան շրջանին առնչւած նիւ­թեր քննարկւեն, առաջարկւած լուծումները երկուստեք ուսումնասիրւեն, եւ համայն­քի կեանքի ծաղկեցնելու համար միջոցներ որոնւեն:

Թեմական խորհրդի ատենապետ Գագիկ Ջորջեանը, ինչպէս նաեւ անդամները մանրամասնութիւններ տւեցին ներքին աշխատանքներից, որոնք կալւածային եւ շինարարական կարեւոր ներդրումներ են թեմի համար, ե՛ւ Արեւելեան, ե՛ւ արեւմտեան շրջաններում Ատրպատականի:

Առաջնորդ Սրբազան Հայրը բարձր գնահատեց Իրանի Իսլամական Հանրապետութ­եան ներդրումի յատկապէս փոքրամասնութիւնների կեանքում, եղբայրական խաղաղ հովանաւորութիւններով: Ապա, նա նշեց բարերար տէր եւ տիկին Էդիկ եւ Սանդրա Մեջլումեանների մնայուն նւիրաբերումները Իրանին եւ հայ համայնքին, դպրոցների կառուցումներով եւ հայ համայնքի կառոյցներին հոգածու վերաբերմամբ:

Պաշտօնական հանդիպման աւարտին, հրաւիրեալները յիշատակի նւէրներ յանձնեցին Սրբազան Հօրը: Ապա նրանք առիթ ունեցան շրջագա­յելու ազգային առաջ­նորդարա­նում, յատկապէս հնատիպերի բաժանմունքում, որ­տեղ Սրբազան Հայրը մանրամասն բացատրութիւններ տւեց հարիւրաւոր տարիք ունեցող ձեռագիր եւ տպագիր հատորների մասին, մինչեւ իսկ Սալմաստի Տէր Թո­դիկի ծանրակշիռ գրքի մասին, որոնք Ատրպատականի հայոց թեմի պատմամշա­կութային հարստութիւնն են կազմում: Ապա բոլորը ազգային առաջնորդարանում կէսօրւայ ճաշի սեղանակիցը դարձան առաջնորդ Սրբազան Հօրը եւ Թեմական խորհր­դին: Հիւրասիրութիւնից յետոյ, նրանք հրաժեշտ տւեցին Սրբազան Հօրը եւ Թե­մական խորհրդին, եւ վերադարձան Ուրմիա: