Հ.Մ.Ա.Կ.-ի 80-ամեակի ծրագրերի շարանում. Երեկոյ՝ նւիրւած Պարոյր Սեւակի ծննդեան 100-ամեակին եւ «Անլռելի զանգակատուն» պոէմի պարսկերէն գրքի շնորհանդէսը
«ԱԼԻՔ», Կ. Դ. – Հ. Մ. «Արարատ» կազմակերպութեան 80-ամեակին նւիրւած միջոցառումների շարանում, երէկ՝ հոկտեմբերի 13-ին, կազմակերպւել էր «Պարոյր Սեւակ»-ի ծննդեան 100-ամեակին նւիրւած երեկոյ՝ հայ եւ ոչ հայ լսարանի համար, եւ «Անլռելի զանգակատան» պարսկերէն թարգմանութեան շնորհանդէսը:
Երեկոն նախաձեռնել էին՝ Հ.Մ.Ա.Կ.-ի 80-ամեակը նշող յանձնախումբը, «Բոխարա» գրական հանդէսը եւ «Նարիման» հրատարակչութիւնը, «Հումանիտար մտաւորականների տան» «Ֆիրդոսի» դահլիճում:
Բանախօսական եւ գեղարւեստական յայտագրով յագեցած միջոցառումը, որը մեկնարկեց «Բոխարա» հանդէսի տնօրէն Ալի Դեհբաշիի խօսքերով, համարւում էր «Բոխարայի գիշերներ» ծրագրերի 773-րդ միջոցառումը: Ալի Դեհբաշին իր ելոյթի ընթացքում համապարփակ գծերով անդրադարձաւ գրական երեկոների կազմակերպման նպատակներին եւ Պարոյր Սեւակին նւիրւած երեկոյին:
Գրական երեկոյի սկզբում ցուցադրւեց Պարոյր Սեւակի կենսագրական եւ գրական գործունէութիւնը արտացոլող տեսաֆիլմ, որի ընթացքում Պարոյր Սեւակի թոռը՝ սեւակագէտ Սեւակ Ղազարեանը, Սեւակի տուն թանգարանում շրջելով ներկայացնում էր Սեւակի անցած ուղին: Ընթացքում Այրինա Նորաւեանը պարսկերէնով ասմունքեց Պարոյր Սեւակի «Անլռելի զանգակատուն» պոէմից հատւածներ, նրան դաշնամուրային կատարումներով ընկերակցում էր Արին Միրզայեանը:
Միջոցառմանը Պարոյր Սեւակի գրական-հասարակական գործունէութեան եւ անցած ուղու մասին առանձին բանախօսութիւններով հանդէս եկան Սերգէյ Բարսեղեանը, եւ Հայաստանից տեսանիւթով դոկտ. Կարէն Խանլարեանը:
Սեւակագէտ Սեւակ Ղազարեանը եւս առանձին տեսանիւթի միջոցով ներկայացրեց Պարոյր Սեւակին եւ իր գնահատանքը յայտնեց կազմակերպւած միջոցառման համար, որի խօսքերը պարսկերէնով ներկայացրեց Արգիշտի Թովմասեանը:
«Անլռելի զանգակատուն» պոէմի պարսկերէն թարգամնութեան հրատարակմանն անդրադարձաւ «Նարիման» հրատարակչութեան տնօրէն Մոջթաբա Նարիմանը, իսկ գրքի պարսկերէնի թարգմանութեան հարցով իր անմնացորդ դերը իրականացրած Անի Յովսէփեանը անդրադարձաւ թարգմանութեանը: Յատկանշական է, որ պոէմը պարսկերէնի է թարգմանել Գէորգ Նուբարեանը: Վերջում կազմակերպւած միջոցառման եւ Հ.Մ.Ա.Կ.-ի 80-ամեայ երթի մասին հակիրճ բացատրութիւններ փոխանցեց Հ.Մ.Ա.Կ.-ի Կենտրոնական վարչութեան նախագահ Սոֆի Ջաղարբէգեանը: Աւարտին Սոֆի Ջաղարբէգեանի եւ Հ.Մ.Ա.Կ.-ի 80-ամեակի կազմակերպիչ յանձնախմբի նախագահ Համլետ Խալոյեանի ձեռամբ գնահատւեցին Ալի Դեհբաշին եւ բոլոր բանախօսներն ու դերակատարները:
Միջոցառմանը ներկայ էին՝ Իրանի Իսլ. խորհրդարանում Թեհրանի եւ հիւսիսային, Սպահանի եւ հարաւային իրանահայութեան պատգամաւորներ Արա Շահվերդեանն ու Գեղարդ Մանսուրեանը, ազգային իշխանութեան, մարմինների ու միութիւնների ներկայացուցիչներ, քահանայ հայրեր, մտաւորականներ եւ մեծ թւով գրասէրներ:
