Հ. Մ. Մ. «Նայիրի» միութիւնը բոլորեց իր հիմնադրման ու գործունէութեան 43-ամեակը

43 տարիներ առաջ Թեհրանի Զէյթուն քաղաքամասը օժտւեց Հ. Մ. Մ. «Նայիրի» միութեամբ: Միութիւն, որի յարկի տակ 43 տարիներ կրթւում ու դաստիարակւում են ազգային ոգով տոգորւած հայորդիներ, որոնք հետագայում իրենց կարեւոր դիրքերն են զբաղեցրել համայնքի ազգային կառոյնցերում:

Միութեան 43-ամեակը նշւեց ուրբաթ՝ նոյեմբերի 1-ին միութեան «Արցախ» սրահում, հէնց միութեան ընտանիքի հետ միասին: Միջոցառումը յագեցած էր գեղարւեստական յայտագրով, գնահատագրերի յանձնումով եւ ընդունելութեամբ: Հանդիսութեան բացումը կատարւեց միութեան սկաուտների շքերթով, Հայաստանի Հանրապետութեան եռագոյն դրօշի ծածանումով եւ «Մեր Հայրենքի» օրհներգով:

Օրւայ բացման խօսքի ընթացքում, որը արտասանում էր Ալին Քեշիշեանը համապարփակ գծերով անդրադարձ էր կատարւել միութեան անցած 43 տարիների իրականացրած, միութենական, ներհամայնքային ու համազգային մասշտաբում աշխատանքներին: Նա ընդգծեց. «43 տարիների ընթացքում միութիւնը իր բոլոր հնարաւորութիւնները ի սպաս է դրել եւ շարունակելու է համայնքի եւ յատկապէս նոր սերնդի մշակութային դաստիարակութեամբ եւ մարզական կարողութիւնների զարգացման ուղղութեամբ: Ամեակները առիթ են հանդիսանում, որ վերանորոգւած մտքով ու հոգով գործենք ու գծենք մեր ապագայ ուղին»:

Ընթացքում ցուցադրւեց տեսաֆիլմ, միութեան 2023-2024 տարեշրջանի կատարած աշխատանքների մասին:

Հանդիսութեան գեղարւեստական յայտագրում, ազգային-ժողովրդական մեներգերով հանդէս եկան Էրիկա Դաւթեանը, եւ Ժիլբերտ Կարապետեանը, ասմունքներով՝ Անիա Բաղումեանը, Դաւիթ Միրզախանեանը, Ադելինա Թէյմուրեանը եւ Քելին Պետրոսեանը:

Ազգագրական պարերով ելոյթ ունեցան Հ. Մ. Մ. «Նայիրի» միութեան «Նայիրի» պարախմբի սաները, գեղարւեստական ղեկավար Արտաւազդ Աւետիսեան, բեմադրիչ Մերի Աւետիսեան, գլխաւոր պարուսոյցներ՝ Թինա Անտոն եւ Սիւնէ Շահվալադեան:

Հանդիսութեանը ներկայ էին «ԱԼԻՔ» հաստատութեան ներկայացուցիչներ Սեւան Դանիէլեանը եւ Ալեքս Կարապետեանը, «ԱԼԻՔ» օրաթերթի գլխաւոր խմբագիր Արամ Շահնազարեանը, Թ. Հ. Թ. Պատգամաւորական ժողովի ատենապետ՝ Սուրիկ Աբնուսեանը, Թ. Հ. Թ. «Հայ կին» միութեանը կից «Անահիտ» միութեան ներկայացուցիչներ  եւ միութենականներ:

Հանդիսութեան պաշտօնական բաժնի աւարտին, եզրափակիչ խօսքի համար ամբիոնի մօտ հրաւիրւեց միութեան վարչութեան նախագահ՝ Սերոժ Օհանեանը: Իր ելոյթի ընթացքում Սերոժ Օհանեանը շնորհաւորելով միութեան 43-րդ տարեդարձը այսպէս շարունակեց. «Շնորհաւոր տարեդարձդ «Նայիրի», այնքան ապրես որ համայնքը քեզ կարիք ունի եւ այդ կարիքի անհրաժեշտութեան ու պահանջի բերումով էր, որ սրանից 43 տարիներ առաջ հիմնադրւեց Հ. Մ. Մ. «Նայիրի» միութիւն, այդ առաքելութեամբ: Անցեալ 43 տարիների ընթացքում միութիւնը ապրել է իրանական, հայաստանեան ու ներհամայնքային  խնդիրներով: Ներհամայնքային առումով միութիւնը իր գործօն ներդրումն է ունեցել Թ. Հ. Թ. Պատգամաւորական ժողովի եւ Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւորի ընտրարշաւի օրերին: Այսօր 43 տարիներ յետոյ աւելի կոփւած, աւելի գործունեայ շարունակում ենք մեր աշխատանքը: Անցեալ 43 տարիների ընթացքում միութիւնը օժտւած է եղել 22 շրջան վարչութիւններով եւ ունեցել հազարաւոր անդամներ, իսկ այսօր միութիւնը օժտւած է չորս բաժանմունքներով եւ տասնեակից աւելի խմբերով ու ենթայանձնախմբերով»: Նա գնահատանքով անդրադարձաւ միութենականների իրականացնող անխոնջ աշխատանքի կապակցութեամբ, ապա համապարփակ գծերով անդրադարձաւ միութեան խմբերի ծաւալած աշխատանքներին, որոնց հիմնական նպատակն է դաստիարակել ազգային ոգով տոգորւած հայորդիներ, եւ փոխանցել այնպիսի ունակութիւններ որոնք օգտակար են հանդիսանալու նրանց կեանքում:

Միութեան վարչութեան նախագահը իր գնահատանքի եւ երախտիքի խօսքերը այսպէս ամփոփեց. «Անցեալ 43 տարիների ընթացքում Ազգային իշխանութիւնը, «ԱԼԻՔ» հաստատութիւնը եւ «ԱԼԻՔ» օրաթերթը իրենց անվերապահ աջակցութիւնն ու համագործակցութիւնն են դրսեւորել միութեան նկատմամբ: Շնորհակալ ենք սիրելի բարերարներին, որոնք միշտ դրական են արձագանգել մեր դիմումներին»:

Հ. Մ. Մ. «Նայիրի» միութեան բաժանմունքները եւ յանձնախմբերն են՝ Երէցների, Արւեստից, Մարզական, Սկաուտական բաժանմունքները, Հայդուկների միաւոր, Նորոգման եւ պահպանման, Լոտոյի, Հանդէս-ձեռնարկի, Հ. Մ. Մ. «Նայիրի» միութեան «Նայիրի» պարախմբի յանձնախմբեր եւ Գրական խումբ:

Վերջում միութեան վարչութեան միջոցով հատւեց միութեան 43-ամեակը խորհրդանշող տորթը եւ վարչականների ձեռամբ գնահատագրեր յանձնւեցին միութեան բոլոր բաժանմունքների, միաւորների ու յանձնախմբերի  կազմերին:

Պաշտօնական բաժնի աւարտին ընդունելութեան ընթացքում օրւայ առիթով իր խօսքը փոխանցեց միութեան ժամանակի նախագահ Ֆրէդ Աշուղեանը: Իր ելոյթի ընթացքում նա կարեւորութեամբ անդրադարձաւ միութեան ազգային-հասարակական բնագաւառներում ծաւալած աշխատանքներին:

Այս բաժնում եւս հնչեցին ազգային երգեր, վերը նշւած երգիչ-երգչուհիների եւ Անի Բոնիադեանի միջոցով:

Թղթակցութիւնը՝ ԿԱՐԻՆԷ ԴԱՒԹԵԱՆԻ

Լուսանկարները՝ Vedi art studio