Իրանահայ Ուսուցիչների միութեան նախաձեռնութեամբ հոկտեմբեր ամսի աւարտին ամենամեայ հոգեհանգստեան արարողութիւն է կազմակերպւում, Թեհրանի Ս. Գէորգ եկեղեցում, ի յիշատակ անցեալ եւ նորոգ հանգուցեալ ուսուցիչ-ուհիների: Ահաւասիկ, ուրբաթ՝ նոյ. 1-ի առաւօտեան Տ. Մեսրոպ քհնյ. Ռաթէոսեանի միջոցով կատարւեց հոգեհանգստեան արարողութիւն Ս. Գէորգ եկեղեցում, կրօնական արարողութեան շարականները կատարում էին եկեղեցու դպրաց դասը:
Հոգեհանգստեան արարողութիւնց յետոյ, եկեղեցու շրջափակում տեղի ունեցաւ բանախօսական եւ գեղարւեստական միջոցառում:
Օրւայ խօսքով հանդէս եկաւ Իրանահայ Ուսուցիչների միութեան նախագահուհի Տանիա Վարդանեանը: Նա իր խօսքերի ընթացքում վեր հանեց երկու սուրբ յաւերժութիւնների՝ Ս. Մեսրոպ Մաշտոցի եւ Ս. Սահակ Պարթեւ կաթողիկոսի կատարած սրբազան գործը եւ նշեց, որ այսօրւայ մեր ուսուցիչների յանձնաւորութեամբ նրանք կատարում են մեր սուրբերի պատգամները եւ հայ գիրն ու բանը փոխանցում հայ երեխաներին եւ մեր ուսուցիչները ուխտում են իսկական ժառանգորդը լինել մեր սրբերի:
Նա ապա յիշեց ընթացիկ տարւայ ընթացքում մեզանից առյաւէտ հեռացած ուսուցիչներին՝ Մադլէն Բաղդասարեանին, Հերիքնազ Մկրտչեանին եւ Լոժէն Խաչիկեանին:
Ձեռնարկին ներկայ էր Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, նորոգ հանգուցեալ ուսուցչուհիների հարազատները, որպէս բանախօս հրաւիրւել էր Թ. Հ. Թ. Կրթական խորհրդի անդամ եւ «Էլպիս Ֆերահեան» մանկապարտէզի հանգստի կոչւած տեսչուհի՝ Այրինա Նորաւեանը: Իր ելոյթի ընթացքում նա այսպէս ասաց. «Դաստիարակութիւնը եղել է միշտ բոլոր ժամանակաշրջաններում։ Մէկ հասարակութիւն առանց այն, կը դադարի ապրելուց ու գոյատեւելուց։ Դաստիարակութեան դաս-դպրոց-ուսուցիչ ձեւը, որ սկսւել է 17-րդ դարից իր ձեւի մէջ այնքան փոփոխութիւններ չի կրել, որքան՝ ուսուցման եւ դաստիարակութան մեթոդներն ու գործնական ձեւերը, որոնք խիստ ազդւել եւ ազդւել են հասարակական պահանջներից եւ գիտութեան առաջադիմութեան պատճառով։
Հասարակական եւ գիտական առաջընթացը, համացանցի տարածման եւ նոր տեխնոլոգիական ու գիտական առաջադիմութեան պատճառով, այնքան արագ է, որ այսօր ուսուցիչները մանաւանդ սփիւռքում աշխատող ուսուցիչը, իր դիմաց ունի մեծ մարտահրաւէրներ, ազգային, հոգեւոր եւ հասարակական ու համամարդկային արժէքները՝ որոնք կարծես թէ համայն աշխարհում, գլոբալիստական եւ համաշխարհայնացման շարժումների բերումով, անկում են ապրում եւ առաջանում են նոր մոդելներ ընտանիքի, հասարակութեան եւ արժէքների։
Ինչեւէ հեշտ չէ սփիւռքում դասաւանդութեան եւ դաստիարակութեան գործը, Մայրենի լեզուն, մշակոյթը եւ արժէքների փոխանցումը եւ կարիք ունի նախ մեծ սիրոյ, ապա մեծ զոհաբերութեան»։
Միջոցառմանը ասմունքով հանդէս եկաւ «Նայիրի» ազգային տարր. Դպրոց աշակերտ՝ Դաւիթ Շահնազարեանը, նախ արտասանեց Յովհ. Շիրազից մի քառեակ ապա Արամայիս Սահակեանի գրչին պատկանող «Ուսուցիչ» բանաստեղծութիւնը:
Եզրափակիչ խօսքի համար հրաւիրւեց խորհրդարանի պատգամաւոր Արա Շահվերդեանը:
Նա անդրադարձաւ աշխարհի ներկայ պայմաններում դաստիարակչութեան եւ կրթութեան համար ստեղծւած հակասական երեւոյթների մասին եւ հայ ուսուցչի կարեւոր դերն այդ ուղղութեամբ: Իր ելոյթի ընթացքում նա կարեւորութեամբ անդրադարձաւ հայ ուսուցչի անմնացորդ դերակատարութեան մասին, որը վերապահւած է նրան, սփիւռքեան պայմաններում հայ նոր սերնդին հայեցի դաստիարակութիւն փոխանցելու առումով:
Ծրագրի աւարտին, միութեան նախագահ Տանիա Վարդանեանը մէկ անգամ եւս միութեան անունից ցաւակցութիւն յայտնեց հանգուցեալ ուսուցիչների հարազատներին եւ շնորհակալութիւն յայտնեց պատգամաւոր, Արա Շահվերդեանին, օրւայ բանախօս Այրինա Նորաւեանին սպառիչ ելոյթի համար եւ ասմունքող Դաւիթ Շահնազարեանին մաղթեց յաջողութիւն:
Նա գնահատանքով արտայայտւեց Թադէոս-Բարթուղիմէոս եւ Ս. Գէորգ եկեղեցիների Եկեղեցական խորհրդին խիստ հոգատար վերաբերմունքի եւ նւիրումով աջակցութեան համար, քանի որ ամէն տարի միութիւնը վայելում է խորհրդի համագործակցութիւնը, շնորհակալութիւն յայտնեց Դպրաց դասին եւ արարողութիւնը կատարող՝ Տ. Մեսրոպ քհնյ. Ռաթէոսեանին:
Միջոցառման աւարտին կազմակերպւել էր համեստ ընդունելութիւն:
Իրանահայ Ուսուցիչների միութիւն
