Զօրակցական աղօթք՝ յանուն Արցախի հարցի բարւօք լուծման եւ գերիների ազատութեան՝ Նոր Ջուղայի Ս. Մինաս եկեղեցում

Կիրակի՝ նոյեմբերի 10-ի առաւօտեան, Նոր Ջուղայի Ս. Մինաս եկեղեցում, Սպահանի հայոց թեմի առաջնորդ Տ. Սիփան արք. Քէչէճեանի նախագահութեամբ մատուցւող կիրակնօրեայ Սուրբ եւ Անմահ Պատարագի ընթացքում, զօրակցական յատուկ աղօթք բարձրացւեց առ Բարձրեալն Աստւած՝ յանուն Արցախի հարցի բարւօք լուծման եւ գերիների շուտափոյթ ազատ արձակման:

Օրւայ պատարագիչ հայրն էր Տ. Խաչատուր քհնյ. Զարգարեանը, իսկ երգեցողութեամբ հանդէս եկան Ս. Ամենափրկիչ վանքի «Տաթեւ» երգչախմբի անդամուհիները՝ ղեկավարութեամբ Համիկ Ալեքսանդրեանի:

Կարգի ընթացքում Տ. Մեսրոպ աւ. քհնյ. Գալստանեանի եւ Տ. Վարդան քհնյ. Աղաբաբայեանի միջոցով ընթերցւեցին Մեծի Տանն Կիլիկիոյ Ն.Ս.Օ.Տ.Տ. Արամ Ա Կաթողիկոսի նախատեսած խնդրանքի եւ պահպանութեան աղօթքը, ինչպէս նաեւ ժողովրդին ուղղւած կոչն ու Վեհափառ Հայրապետի գլխաւորութեամբ իրագործւած աշխատանքները՝ Արցախի հարցի լուծման շրջագծում:

Ահա մէջբերում՝ հայ ժողովրդին ուղղւած կոչում թելադրւած անելիքներից.

«ա) COP29 միջազգային համագումարի նախօրեակին եւ դրա աշխատանքների ընթացքին յատուկ կարեւորութեամբ արծարծելու Արցախի հայութեան նկատմամբ շարունակւող անարդարութիւնը, յատկապէս շեշտելով՝ միջազգային երաշխաւորութեամբ իր պատմական հողերը վերադառնալու եւ ինքնիշխանութիւնը վերահաստատելու Արցախի ժողովրդի արդար իրաւունքը:

բ) Մեր բոլոր կարելիութիւններն առաւելագոյն չափով ի սպաս դնելու Արցախի հայութեան իրաւունքների պաշտպանութեան՝ քաղաքական, պետական, դիւանագիտական, միջկրօնական ու միջեկեղեցական շրջանակներում՝ յարաբերական ու տեղեկատւական միջոցների լայն օգտագործումով:

գ) Եկեղեցիներում արարողութիւնների եւ հաւաքական պաշտամունքների ընթացքին աղօթելու Արցախի քաղաքական բանտարկեալների եւ զինւորական գերիների շուտափոյթ ազատ արձակման համար»:

Աւելացնենք նաեւ, որ Շահինշահրի Սրբոց Վարդանանց եկեղեցում մատուցւող կիրակնօրեայ Սուրբ եւ Անմահ Պատարագի ընթացքում նոյնպէս ընթերցւել են Վեհափառ Հայրապետի նախատեսած աղօթքը, կոչն ու գործունէութեան զեկոյցը՝ Տ. Սահակ քհնյ. Մինասեանի միջոցով:

Մեր սրտի բարեմաղթանքն է նաեւ, որ հնչած աղօթքները հասնեն առ Աստւած եւ Բարձրեալը մեր ժողովրդի խնդրանքը լսելով, բարի օրեր ու յաջողութիւն պարգեւի հայ ժողովրդին՝ իր արդար Դատի, ի մասնաւորի Արցախի հարցի լուծման գործընթացին:

Թղթակից (Նոր Ջուղա)