Չորեքշաբթի, դեկտեմբերի 25-ին, ազգային առաջնորդարան այցելեցին պաշտօնական այցով Թեհրան ժամանած՝ Խորւաթիայի մեծ մուֆթի Ազիզ Հասանովիչի գլխաւորած պատւիրակութիւնը՝ ուղեկցութեամբ Իսլամական մշակոյթի եւ հաղորդակցութեան կազմակերպութեան եւ Իսլամական խմբաւորումների մերձեցման կազմակերպութեան ներկայացուցիչների:
Ազգային առաջնորդարանում հիւրերին դիմաւորեցին՝ Տ. Առաքել աբղ. Գատէհճեանը, Իրանի Իսլ. խորհրդարանում իրանահայութեան զոյգ պատգամաւորներ՝ Արա Շահվերդեանը եւ Գեղարդ Մանսուրեանը, Թեմական խորհրդի ատենապետ Վարուժ Յովհաննիսեանը, Հանրային կապի հոգեւոր խորհրդատու Տ. Գրիգորիս քհնյ. Ներսիսեանը եւ ազգ. առաջնորդարանի դիւանապետ Զօրիկ Կարապետեանը:
Պատւիրակութիւնը նախ մուտք գործեց Ս. Սարգիս եկեղեցի ապա ազգային առաջնորդարանի դահլիճում կայացած հանդիպմանը, Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը ողջունելով, իր ուրախութիւնը յայտնեց հիւրերի ներկայութեան եւ կատարւած այցի առիթով: Նա ամփոփ անդրադարձ ունեցաւ իրանահայ երեք թեմերում, համայնքների եկեղեցական ու ազգային կեանքին եւ յոյս յայտնեց, որ առիթ ընձեռնւի նաեւ միւս թեմերի այցելութեան:
Հայր Սուրբն իր ելոյթի ընթացքում Թեհրանի հայոց թեմի առաջնորդ Տ. Սեպուհ արք. Սարգսեանի ողջոյնի խօսքերը փոխանցելով, շնորհակալութիւն յայտնեց հիւրերին՝ ներկայութեան ու շնորհաւորանքների համար:
Մեծ մուֆթի Ազիզ Հասանովիչը իր շնորհակալութիւնը յայտնեց ջերմ ընդունելութեան համար եւ իր շնորհաւորանքները փոխանցեց մօտալուտ Ամանորի եւ Ս. Ծննդեան տօների առիթով:
Հանդիպման աւարտին յուշանւէրներ յանձնւեցին յարգոյ հիւրերին:
Ազգային առաջնորդարանի Հանրային Կապ
