Նոր տարւայ հաւաքոյթ Թաւրիզի հայոց դպրոցում
Ատրպատական, ազգային առաջնորդարան, Թաւրիզ – Շաբաթ՝ դեկտեմբերի 28-ի առաւօտեան ժամը 11:00-ին, Թաւրիզի հայոց ազգային «Հայկազեան-Թամարեան-Սահակեան» դպրոցում, Հովանաւորութեամբ եւ նախագահութեամբ առաջնորդ Սրբազան Հօրը եւ Թեմական խորհրդի, տեղի ունեցաւ 2025 Նոր տարւայ յատուկ հանդիսութիւն: Ներկայ էին Ատրպատականի արեւելեան նահանգի կրթադաստիարակչութեան ընդհանուր տնօրէնը, երրորդ նահանգի ընդհանուր տնօրէնը, Փոքրամասնութեան պատասխանատուն, պետական հիւրեր, Թեմական խորհրդի ատենապետ Գագիկ Ջորջեանը եւ անդամներ, ծնողներ եւ ազգային հիւրեր:
Սոյն հանդիսութիւնը կազմակերպւել էր դպրոցի տեսչութեան, հոգաբարձութեան, ուսուցչական կազմի եւ ծնողական խորհրդի կողմից, գլխաւորութեամբ տեսչուհի Սիլւա Աշըղեանի:
Բացման խօսքը արտասանեց տեսչուհին, ողղջունելով բոլորի ներկայութիւնը եւ բարի Նոր տարւան ջերմ մաղթանքներ ներկայացնելով սրահում հաւաքւած բոլոր անձերին: Նա մաղթեց, որ 2025 տարին հայոց դպրոցի բոլոր աշակերտների համար կը լինի արգասաբեր:
Յիսուսի ծննդեան պատգամը փոխանցելով, առաջնորդ Սրբազանը ողջունեց ներկաներին, շնորհաւորելով բոլորի նոր տարին: Նա աշխարհի ներկայ իրավիճակի եւ Միջին Արեւելեան երկրներում անորոշութիւններին ակնարկելով, յիշեց մի անձ, որը տագնապալի երկրներից մէկի բնակիչը լինելով, հաւատքի մէջ թուլութիւն էր զգացել. «Դժւարութիւնները եթէ մեզ տկարացնեն, դա նշանակում է, որ մենք ուժեղ հաւատացեալներ չենք: Ուրեմն միայն մեր հանգիստի պահերին, առողջութեան օրերին, անվտանգութեան ժամանակ Աստծուն հաւատում ենք: Փորձանքները փորձութիւններ են, որոնցմով պիտի վաւերացւի մեր հաւատքը: Պատերազմի տեւողութեան ընթացքում մեծացած երեխայ ենք եղել մենք անձնապէս, եւ մինչեւ այսօր դիմանում ենք դժւարութիւնների: Ահա թէ ինչպէս տոկունութեան փորձեր է կատարում Աստւած: Եթէ դժւարութեան մէջ չկարողանանք պահպանել մեր հաւատքը, դա նշանակում է, որ հաւատացեալ կոչւելու արժանի մարդիկ չենք մենք», ասաց Սրբազանը: Նա վերջապէս յոյսով լցրեց ներկաներին, աղօթքի միջոցով դիմելու Աստծուն, փրկութիւն հայցելու համայն աշխարհի համար:
Կրթադաստիարակչութեան երրորդ նահանգի ընդհ. տնօրէն հաջ. Հոսէյնզադէ խօսք առնելով շնորհաւորեց բոլորին, Նոր տարւայ յաջողութեան եւ աշխարհի խաղաղութեան համար բարեմաղթանքներ կատարելով: Նա եւս անդրադարձաւ Գազայում տեղի ունեցող անհաւասար պատերազմին եւ պաղեստինցի անմեղ ժողովրդի կոտորածին, մաղթելով, որ անարդարութիւնը վերանայ մարդկութեան կեանքից եւ խաղաղութիւնը տիրի:
Ամանորը եւ Սուրբ Ծննդեան տօնը շնորհաւորող ջերմ խօսքերով հանդէս եկաւ նահանգի կրթադաստիարակչութեան տնօրէն դոկտ. Սաատադի, որը երջանիկ ու խաղաղ տարի մաղթեց համայն աշխարհին:
Աշակերտ Թադէ Վարդանեանը ձմեռ պապի տարազով մուտք գործեց սրահ, պարեց բոլորի առջեւ, եւ ապա «Տարւայ մարդ»-ու սպասւած պատգամը ընթերցեց, ի լուր բոլոր ներկաներին: Նա մանրամասնութեամբ խօսեց այն աւանոյթների մասին, որոնք կիրառւում են ամանորի առթիւ, ներկայացնելով հայկական ամանորը, այսինքն Նոր տարին դիմաւորելու հայկական աւանդութիւնները, ինչպէս նաեւ Քրիստոսի Սբ. Ծնունդը դիմաւորելու ազգային-եկեղեցական տօնախմբութիւնները:
Դպրոցի ծնողական խորհուրդը հիւրասիրութեամբ պատւեց ներկաներին, մինչ Ձմեռ պապին յանկարծ յայտնւեց սրահում, պարեց, ուրախացրեց բոլորին եւ մանաւանդ կաղանդչէքեր բաժանեց ներկաներին:
Հանդիսութիւնից յետոյ, բարձրաստիճան հիւրերը, Սրբազան Հօր հետ միասին շրջագայեցին դասարանները, եւ հարցեր տւեցին աշակերտներին, ստանալով իմաստուն պատասխաններ:
