Ամանորի եւ Ս. Ծննդեան տօների առիթով, երկուշաբթի՝ 30 դեկտեմբերի 2024 թւականին, ազգային առաջնորդարան այցելեց Իրանում էթնիկ խմբերի եւ կրօնական համայնքների հարցերով Հանր. նախագահի յատուկ տեղակալ հոջթ. Սէյէդ Մահմուդ Ալաւին եւ նրան ընկերակցող պատւիրակութիւնը:
Հիւրերին դիմաւորեցին Տ. Առաքել աբղ. Գատեհճեանը, Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թեմական խորհրդի ատենապետ Վարուժ Յովհաննիսեանը, փոխատենապետուհի Արմինէ Սէթխանեանը, ատենադպիր Մհեր Օհանեանը, Տ. Սահակ քհնյ. Խոսրովեանը եւ ազգային առաջնորդարանի դիւանապետ՝ Զօրիկ Կարապետեանը:
Ազգային առաջնորդարանի դահլիճում կայացած հանդիպման սկզբին, Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը ողջունեց հիւրերի ներկայութիւնը եւ ուրախութիւն ու երախտագիութիւն յայտնեց կատարւած այցի կապակցութեամբ:
Հոջթ. Սէյէդ Մահմուդ Ալաւին Ամանորեայ եւ Ս. Ծննդեան տօնական օրերի առիթով շնորհաւորանքներ եւ բարեմաղթանքներ յայտնելով, շնորհակալութիւն յայտնեց ջերմ ընդունելութեան համար: Նա շնորհաւորագրեր յանձնելով, փոխանցեց Իրանի Հանրապետութեան նախագահ Մասուդ Փեզեշքիանի ողջոյնի խօսքերը:
Հայր Սուրբը նաեւ իր հերթին՝ Թեհրան հայոց թեմի առաջնորդ Տ. Սեպուհ արք. Սարգսեանի ողջոյնի խօսքերը փոխանցեց եւ կարեւորութեամբ ընդգծեց, որ Իրանի Իսլ. Հանրապետութեան ներկայացուցիչները վերջին օրերին կրկին ապացուցեցին, որ յատուկ ուշադրութիւն եւ սէր ունեն Իրանի քրիստոնեայ քաղաքացիների հանդէպ: Նա յաւելեց, որ Իրանի հայ համայնքը՝ պարսիկ հայրենակիցների հետ եղբայրական եւ բարեկամական կապն ընդմիշտ պահպանել եւ երկրի բարգաւաճման ու զարգացման համար՝ տարբեր բնագաւառներում մեծ ներդրում եւ գործօն դերակատարութիւն է ունեցել:
Հանդիպման աւարտին, հիւրերին նւիրւեց «Իրանի Հայկական եկեղեցիներ» խորագրով՝ պարսկերէն եւ անգլերէն լեզւով հրատարակւած գիրքը, որից յետոյ այցելութիւն կատարւեց Ս. Սարգիս եկեղեցի:
Ազգային առաջնորդարանի Հանրային կապ
