Նկարչուհի Ծաղիկ Յովսէփեանի հաւաքական ցուցահանդէսը Ուրմիայում

Ատրպատական, ազգային առաջնորդարան, Թաւրիզ – Հինգշաբթի՝ յունւարի 9-ի ժամը 2:00-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի ձեռամբ պաշտօնական բացումը կատարւեց ուրմիահայ նկարչուհի՝ արւեստագէտ Ծաղիկ Յովսէփեանի ցուցահանդէսին:

Ուրմիայի արւեստից կենտրոնի գլխաւոր ցուցասրահի բացման ժապաւէն կտրեց Սրբազան Հայրը, կողքին ունենալով Իսլ. Մշակոյթի եւ առաջնորդութեան գերատեսչութեան ընդհանուր տնօրէն դոկտ. Նորուզիին եւ արւեստագիտուհի Ծաղիկ Յովսէփեանին: Ներկայ էին արւեստագիտուհու աշակերտ-աշակերտուհիները, քաղաքի արւեստագէտներ եւ մեծ թւով հրաւիրեալներ:

Պատերին ամրացւած գեղանկարները ներկայացնում էին Յովսէփեանի հին եւ նոր գործերից օրինակներ, ինչպէս նաեւ նրա ղեկավարած արւեստի դպրոցի աշակերտական նկարչութիւններից օրինակներ:

Գեղանկարչուհին իւրաքանչիւր ցուցանմոյշի մասին բացատրութիւններ տւեց պաշտօնական հրաւիրեալներին, իսկ աշակերտական ցուցանմոյշների մասին բա­ցատրական խօսքերով հիւրերին ներկայացան գեղանկարիչ ուսանողները իրենք: Հետաքրքիր էր, որ սոյն բաժնում տեղադրւած գեղանկարների հեղինակները բոլոր տարիքի անձեր էին, կանայք եւ տղամարդիկ, որոնք առօրեայ հոգսերից բացի, արւես­տի միջոցով իրենց հոգեկան ծալքերն էին բացել, բնութեան եւ այլ տեսարանների գեղանկարներով:

Հայերէն եւ պարսկերէն լեզուներով ներկաներին ողջունեցին, աշակերտուհի Նարինէ Մեջլում­եանը, ինչպէս նաեւ արւեստագիտուհին՝ Ծաղիկ Յովսէփեանը:

Առաջնորդ Սրբազանը պաշտօնական խօսքով իր բարձր գնահատանքը յայտ­նեց գեղանկարչուհուն, յատկապէս շեշտելով արւեստի բարերար դերակատարութիւ­նը մարդկութեան կեանքում. «Այն ինչ որ մենք չենք տեսնում, բնութեան, մարդկային զգացական աշխարհում եւ ուրախալի ու տխուր իրավիճակներում, գեղանկարչութիւ­նը կարդում է այս ամէնի մասին, տեսնում է այն ինչ որ ծածկւած է մնում տեսողութիւ­նից»,- ասաց Սրբազան Հայրը: Նա գնահատեց յատկապէս Յովսէփեանի ջանքը, իր ար­ւեստը ուրիշներին եւս փոխանցելու համար: Սրբազանը յիշեց նաեւ այն կրօնական բնոյթի իւղանկարները, որոնք Ծաղիկ Յովսէփեանի վրձինին պատկանելով, զար­դարում են Ուրմիայի հայկական տարբեր եկեղեցիների սրբապատերը:

Մշակութային հիմնարկութեան տնօրէն դոկտ. Նորուզի, իր հերթին գնահատա­կան խօսքով հանդէս եկաւ, իր ուրախութիւնը եւ միաժամանակ քաջալերանքը արտայայտելով արւեստագիտուհուն: Նա գնահատեց յատկապէս նրա ձեռամբ արւեստի ջահը այլոց փոխանցելու անձնական ջանքը: Յայտնենք նաեւ, որ Ծաղիկ Յովսէփեա­նի աշակերտական խմբին մաս էին կազմում հայ քրիստոնեայ եւ մուսուլման կրօննե­րի հետեւորդ աշակերտուհիների պատկանող, որոնք իրենց ուսուցչուհու կողմից եւ բարձրաստիճան հիւրերի ձեռամբ գնահատագրեր ստացան: Ցուցահանդէսի մի ան­կիւնում նաեւ կա­յին ձեռարւեստի պատկանող նմոյշներ, դրանք կերտող հայերի կողմից բացատրութ­իւններով ճոխացած:

Ցուցասրահում մատուցւած հիւրասիրութեան ընթացքին, բոլոր ներկաները մօտկից նայեցին ցուցադրւած պատկերներին, հաղորդւելով դրանց նիւթերին եւ դէմքերի արտայայտութիւններին: