Սպահանի հայոց թեմի եկեղեցիներում նշւեցին Ծաղկազարդն ու Դռնբացէքը

Կիրակի՝ ապրիլի 13-ի առաւօտեան, Նոր Ջուղայի «Ս. Յովհաննու Կարապետ», իսկ Շահինշահրի Սրբոց Վարդանանց եկեղեցիներում Ս. եւ Անմահ Պատարագ մատուցւեց՝ Քրիստոսի Երուսաղէմ կատարած յաղթական մուտքի յիշատակի տօնի առթիւ: Սպահանի հայոց թեմի առաջնորդ Տ. Սիփան արք. Քէչէճեանը նախագահեց Շահինշահրի Սուրբ Պատարագին, որտեղ կարգը մատուցւեց Տ. Սահակ քհնյ. Մինասեանի միջոցով, իսկ երգեցողութեամբ հանդէս եկաւ «Նարեկ» երգչախումբը:

Սրբազան Հայրն օրւայ քարոզում մէջբերելով Հին Կտակարանից Զաքարիա մարգարէի կանխասացութիւնը՝ Քրիստոսի Երուսաղէմ մուտք գործելու մասին, յատկապէս շեշտեց, թէ մարգարէն ապրել է Քրիստոսից հարիւրաւոր տարիներ առաջ, ինչը ոչ միայն վկայում է նրա մարգարէութիւնը, այլ նաեւ Յիսուս Քրիստոսի գալստեան իրողութիւնը:

Թեմակալ առաջնորդն ընդգծելով, որ Զաքարիա մարգարէի խօսքն իրականացաւ դարեր յետոյ՝ յորդորեց ներկաներին, թէ Ծաղկազարդի տօնը լաւագոյն առիթը դարձնելով, որպէս Քրիստոսի հետեւորդներ ու ծառաներ, Տիրոջ արդար, փրկագործ եւ խոնարհ յատկութիւններն առնելով, դառնան իսկական քրիստոնեաներ եւ Քրիստոսի զինւորներ:

Աւարտին օրհնւեցին եւ ներկաներին բաժանւեցին ձիթենու ճիւղերը:

Նշելի է նաեւ, որ Նոր Ջուղայի հայոց ազգ. Մանկապարտէզ-նախակրթարանի եւ «Արմէն» տարրական դպրոցի առաջին, երկրորդ եւ երրորդ դասարանների սաներն իրենց ուսուցիչների ընկերակցութեամբ ներկայ գտնւեցին Նոր Ջուղայի «Ս. Յովհաննու Կարապետ» եկեղեցու արարողութեանը:

Նոյն օրը երեկոյեան Նոր Ջուղայի Ս. Ստեփանոս, Ս. Յովհաննու Կարապետ, Ս. Աստւածածին եւ Ս. Մինաս, իսկ Շահինշահրի Սրբոց Վարդանանց եկեղեցիներում կատարւեց Դռնբացէքի կարգը: Սրբազան Հայրը ներկայ գտնւելով Ս. Յովհաննու Կարապետ եկեղեցում՝ իրականացրեց այս հոգեպարար արարողութիւնը: Այստեղ երգեցողութիւնը կատարեց «Շուշանիկ» երգչախումբը՝ ղեկավարութեամբ Անուշ Յովհաննիսեանի:

Աւետարանական ընթերցումներին, շարականներին եւ փոխասացութիւններին յաջորդեց Սրբազան Հօր միջոցով իրականացւող փակ վարագոյրի առջեւ երկնային արքայութեան դռների փակելը խորհրդանշող բաժինը, որից յետոյ բացւեց Մեծ Պահքի ժամանակաշրջանի համար փակւած վարագոյրը:

Թեմակալ Առաջնորդն արարողութեան աւարտին անդրադառնալով Դռնբացէքի խորհրդին՝ շեշտեց, թէ հանդերձեալ կեանքում բոլորը երկնքի արքայութեան դռների առջեւ կանգնած պէտք է թակեն այն, խնդրելով, որ Աստւած բացի երկնքի արքայութեան դռները: Նա ընդգծեց նաեւ, թէ մեղքերի պատճառով մարդ արարածը հեռացել է երկնքի արքայութիւնից եւ պէտք է ապաշխարելով, զղջալով, Սուրբ գիրք ընթերցելով, աղօթքով ու բարեգործութեամբ, վերստին երկնաւոր Հօր զաւակները դառնայ:

Թղթակից (Նոր Ջուղա)