Իրանահայ Գրողների միութեան նախաձեռնութեամբ՝ սոյն թւականի մայիսի 23-ին, «Ռոստոմ» մշակութային համալիրում տեղի ունեցաւ յիշատակի եւ յարգանքի ձեռնարկ՝ նւիրւած նորոգ հանգուցեալներ. բազմավաստակ բանաստեղծուհի՝ Արփի Ալեքսանդրին եւ 29-րդ շրջանի ԻԳՄ վարչութեան անդամուհի՝ Ադրինէ Շահնազարեանին:
Ծրագիրն սկսւեց Տէր Արիստակէս քհնյ. Շահմիրեանի Տէրունական աղօթքով, որից յետոյ ձեռնարկի բացումը կատարեց վարչութեան նախագահ՝ Թորգոմ Տէր Յակոբեանը: Նա ամփոփ կերպով անդրադարձաւ միութեան տարիների անդամուհի-գրող՝ Արփի Ալեքսանդրի բանաստեղծական գրչին եւ ապա թախիծով ու ափսոսանքով նշեց վարչութեան երիտասարդ անդամուհի՝ Ադրինէ Շահնազարեանի կորստի մասին, ով կարող էր իր ներդրումով եւ նոր շունչով լիցքաւորել միութեան աշխատանքները:
Ծրագրի գեղարւեստական առաջին բաժնում մեներգեց Զօրիկ Ֆարհադեանը՝ Կոմիտասի «Ընտրեալ Աստւած» շարականը, ապա հաղորդավար՝ Լորեթա Ղեւոնդեանը հրաւիրեց միութենական՝ Իրինա Մանսուրեանին, ներկայացնելու իր գրչին պատկանող «Յոյսով եմ սակայն» յուզումնալից բանաստեղծութիւնը՝ նւիրւած Ադրինէ Շահնազարեանին ու նաեւ «Սիրոյ Անուրջ» քերթւածը:
Ֆրէդ Մաւաթեանը ընթերցեց Ադրինէ Շահնազարեանի կենսագրականից.՝ «Ես ապրել էի ուզում, բայց աւաղ մահը ժամանակից շուտ դուրս եկաւ եւ փռւեց շուրջս, իր տխուր երգը երգեց, ինչ արած ես գնացի թէկուզ ապրել էի ուզում:», նաեւ ինքնագիր քառեակներով գովասանքի խօսքեր նւիրեց հանգուցեալին:
Արփի Ալեքսանդրի կենսագրականն ընթերցեց Լորեթա Ղեւոնդեանը.՝ «Կան անուններ, որոնք բոլորին ներշնչում են խորին յարգանք եւ մեծարանք… Նրանք ժողովրդին ծառայում ենք որպէս հասարակական անխարդախ գործիչներ: Այդ սիրւած անուններից է Արփի Ալեքսանդրը, որ դեռ երիտասարդ տարիներից գործօն մասնակցութիւն է ունեցել մշակոյթի ասպարէզում:» Նա գեղարւեստական ընդմիջումներով ներկայացրեց բանաստեղծուհու «Երջանկութեան Արձագանգ» եւ «Ձեռքերս կամուրջ են» ժողովածուներից՝ «Ներբող մօր համար», «Մայրեր», «Հայի Գարունը», «Արեւը՝ Արեւի դէմ», «Խորտակւած անուրջներ», «Եդեմն Իրական – Ձօն Արցախին» եւ «Կենսափորձով» բանստեղծութիւնները:
Հաղորդավարն անդրադարձաւ Արփի Ալեքսանդրին յղւած, Հայաստանեան գրողների.՝ Ռազմիկ Դաւոյեանի, Արտաշէս Ղազարեանի, Գայիանէ Յակոբեանի, Մարգարիտա Շմաւոնեանի եւ Աննա Արծրունիի, գովասանական արձակ գրութիւններին:
Գեղարւեստական միւս բաժնում, Եօլանդա Մանսուրեանը կատարեց «Կարօտ հայրենիք» երգը՝ Աւետիք Իսահակեանի խօսքով եւ ժոռա Մինասեանի երաժշտութեամբ: Միւս մեներգը կատարեց Զօրիկ Ֆարհադեանը, Մակար Եկմալեանի «Տէր Ողորմեա» զգայացունց շարականը:
Ծրագրի վերջին բաժնում, հաղորդավարը հրաւիրեց Էդւարդ Յարութիւնեանին, ով ժամանակին Արփի Ալեքսանդրի հետ աշխատել էր վարչական կազմում եւ կարեւորեց հանգուցեալի թողած աւանդը՝ վերջին գրութիւնները միատեղել եւ ժողովածուի վերածել: Նաեւ մօտիկից ծանօթ լինելով Ադրինէ Շահնազարեանին, խորը ափսոսանք յայտնեց նրա վաղաժամ կորուստի համար: Միւս հրաւիրեալ՝ բանաստեղծ Վարանդ Քուրքչեանն արտայայտւեց գրողների միութեան առաքելութեան՝ ազգապահպանման վսեմ նպատակների մասին, իր կազմում ունենալով Արփի Ալեքսանդրի նման փորձառու անդամ-գրողներ եւ իհարկէ ներգրաւելով Ադրինէ Շահնազարեանի նման սկսնակ եւ երիտասարդ անդամներ:
Միջոցառման կրտսեր հրաւիրեալ՝ Շարլոթ Շահնազարեանը (Ադրինէ Շահնազարեանի եղբօր աղջիկը) Համօ Սահեանի «Հայաստան ասելիս» բանաստեղծութեան ասմունքով երանգաւորւեց ծրագիրը, որից յետոյ Աշխէն Եղիայեանը (Ադրինէ Շահնազարեանի մայրը), իր խորին շնորհակալութիւնը յայտնեց ԻԳՄ վարչութեանը՝ կազմակերպած ծրագրի համար եւ բոլոր նրանց, ովքեր թէ՝ բարոյապէս եւ թէ՝ նիւթապէս օժանդակել են Շահնազարեան ընտանիքին, կորստի անհուն վիշտը սփոփելու համար:
Յուշերեկոյին որպէս եզրափակիչ խօսք՝ Տէր Արիստակէս քհնյ. Շահմիրեանը փոխանցեց թեմակալ առաջնորդ` Տ. Սեպուհ արք. Սարգսեանի անունից` օրհնութեան, բարեմաղթանքի եւ ցաւակցական խօսքը։ Տէր Հայրը իր շնորհակալական խօսքն ուղղեց Իրանահայ Գրողների միութեանը, բարձր գնահատելով կատարելիք պարտականութիւնը՝ պահպանելու համար ազգային եւ մշակութային արժէքները եւ «Հոգւոց հանգուցելոց» աղօթքով խաղաղութիւն մաղթեց հանգուցեալների հոգու համար:
Նշելի է, որ գեղարւեստական բաժնի կատարումին նւագակցում էր՝ Լուիզա Աւետիսեանը:
Իսկ կենսագրական նիւթերը տրամադրել էր միութենական՝ Յովիկ Մինասեանը:
Ծրագրի աւարտին, ներկաները հիւրասիրւեցին համեստ ընդունելութեամբ:
Իրանահայ Գրողների Միութեան վարչութիւն
Կազմեց՝ ԼՈՐԵԹԱ ՂԵՒՈՆԴԵԱՆ
