Ատրպատականի հայոց թեմի առաջնորդը վերադարձաւ թեմ

Ատրպատական, ազգային առաջնորդարան, Թաւրիզ – Ատրպատականի հայոց թեմի առաջնորդ Տ. Գրիգոր արք. Չիֆթճեանը, կիրակի, յուլիսի 13-իին վերադարձաւ Իրան, Անթիլիասում Մեծի Տանն Կիլիկիոյ Վեհափառ Հայրապետ՝ Նորին Սուրբ Օծու­թ­իւն Տ. Տ. Արամ Ա կաթողիկոսի նախագահութեամբ անցած ամիս տեղի ունեցած ժո­ղովական հանդիպման ներկայ գտնւելուց յետոյ:

Երկրում տիրող ռազմական դէպքերի ընթացքին օդանաւակայանների փակ­ւած լինելու պատճառով, Սրբազան հայրը չէր կարողանում վերադառնալ թեմ, սակայն գլխաւոր քաղաքներում օդանաւա­կա­յանների բացումից անմիջապէս յետոյ, նա Թե­հ­րան ժամանեց Արաբական Էմիրութեանց Դուբայ քաղաքի վրայով: Թեհրանում հիւրըն­կալւելով տեղի հայոց թեմի ա­ռաջնորդ Տ. Սեպուհ արք. Սարգսեանի բնակարանում, Սրբազանը յատուկ ա­ղօթք բարձ­րաց­րեց առ Աստւած, Թեհրանի հայոց առաջնորդի շուտափոյթ առողջութեան համար: Նոյն վայրում Գրիգոր Սրբազանի հետ հանդիպեց Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, որ ողջունեց նրա վերադարձը:

Յաջորդ օրը՝ յուլիսի 14-ին, Գրիգոր Սրբա­զան ցամաքի ճանապարհով ու­ղեւորւեց Թաւ­րիզ, եւ երեկոյեան ժամը 7:30-ին մուտք գործեց ազ­գային առաջնոր­դա­րան: Ազգային Իշխանութիւնը բարի գալստեան անակնկալ հաւաք էր կազմակեր­պել առաջնորդարանի մուտքին, դիմաւորելով Սրբազան հօրը: Ապա, «Էմիլ Յակոբեան» դահլիճում յատուկ խօսքերով Սրբազան հօր իրենց ջերմ ողջոյնը հաղորդեցին ներկաները՝ Պատգամաւորական ժողովի ատենապետուհի Արմինէ Վահ­րամեանի եւ Թեմական խորհրդի ատենապետ Գագիկ Ջորջեանի գլխաւորութեամբ:

Առաջնորդ Սրբազանը բոլոր ժողովականների եւ թեմի ժողովրդի զաւակների ներողամտութիւնը խնդրեց օդային ճանապարհների փակ լինելու պատճառով իր բացակայութեան համար, յիշեցնելով, որ Անթիլիասի մայրավանքից ամենօրեայ կապի մէջ էր եղել Թեմական խորհրդի հետ, հետեւելով բոլոր անցուդարձերին:

Դիմաւորութեան կարճ հանդիպումը առիթ հանդիսացաւ, յառաջիկայ օրերին թեմում տեղի ունենալիք ծրագրերի նախապատրաստական աշխատանքների վերա­տեսութիւնը կատարելու: