«ԱԼԻՔ», Կ. Դ. – Թեհրանի հայոց թեմի 17-րդ գումարման Պատգամաւորական ժողովը իր հրթական նիստը անցկացրեց երէկ՝ սեպտեմբերի 13-ին, դոկտ. Աեւակ Հաթամեանի ատենապետութեամբ:
Նիստի սկզբում, ՊԺ-ի ատենադպիր Արփի Ալավերդեանը ներկայացրեց ՊԺ-ին ուղղւած՝ ատենապետ Սուրիկ Աբնուսեանի, Կրօնական խորհրդի եւ մի քանի այլ պատգամաւորների նամակները: Անդրադառնալով Սուրիկ Աբնուսեանի նամակին՝ Սեւակ Հաթամեանը նշեց, որ ատենապետ Սուրիկ Աբնուսեանը թէեւ երկար ժամանակով երկրից բացակայելու է, սակայն դիւանը որոշել է, որ հեռակայ կարգով կապը պահել յիշեալի հետ: Ապա ժողովը զբաղւեց Թեհրանի հայոց թեմի առաջնորդ Տ. Սեպուհ արք. Սարգսեանի առողջական վիճակով՝ արձանագրելով, որ բարեբախտաբար Սրբազան Հօր առողջական վիճակը մասամբ բարելաււել է, եւ հնարաւոր է շուտով հնարաւորութիւն ստեղծւի, որպէսզի Սրբազան Հայրը կարողանայ ազգային առաջնորդարանում աստիճանաբար վերսկսի իր գործունէութիւնը:
Ժողովի ընթացքում Հաշւեքննիչ մարմնի ատենադպիր Գիլդա Իսրայէլեանը ներկայացրեց մարմնի կողմից անցեալ մէկուկէս ամեայ կտրւածքով կատարած հաշւեքննութիւնը:
Մարմինը հաշւեքննութիւն էր իրականացրել Թեհրանի հայոց թեմի մանկապարտէզներում, դպրոցներում, եկեղեցիներում, «Ա. Աւետիսեան» ազգային բուժարանում եւ ազգային առաջնորդարանում: Հաշւի առնելով հաշւեքննութեան արդիւնքները, պատգամաւորները ուղղեցին իրենց հարցումները, որոնցից շատերը առնչւում էին դպրոցների եւ եկեղեցիների բիւջետային պատկերին, որոնք ընդհանրապէս բացերի դիմաց էին կանգնած:
Դադարից յետոյ, յաջորդ օրակարգով ժողովը զբաղւեց Թ. Հ. Թ. Թեմական խորհրդի կողմից անցեալ նիստին արծարծած հարցով՝ խորհրդի նոր անդամի՝ Արին Ալեքսանդրեանի ներգրաւմամբ, փոխարինելու մարմնի նիւթականի նախկին պատասխանատուին, որը տեղափոխւել է Հայաստան: Ժողովը ձայների մեծամասնութեամբ, որպէս Թեմական խորհրդի նոր անդամ ընտրեց Արին Ալեքսանդրեանին:
