Սիրելի ընթերցող,
Մենք գիտենք, որ մեր օրաթերթի չորս էջից կազմւած վերջին մի քանի համարները կարող է անսպասելի լինել ընթերցողների համար, ովքեր մեզ հետ միասին սովոր են «ԱԼԻՔ»-ը տեսնել աւելի ծաւալուն անդրադարձներով ու լրատւութեամբ։ Սակայն, այս որոշումը պայմանաւորւած էր մեր երկրում տիրող արտակարգ իրավիճակով։
Իրավիճակի հետեւանքով առաջացած լարւած վիճակը, յատկապէս անցեալ շաբաթւայ երեկոյեան ժամերին, գործնականում անհնարին դարձրեց սովորական ռեժիմով աշխատանքը։ Թերթի ժամանակին տպագրումն ու առաքումն ապահովելու համար, մեր համար միակ ելքը տպարանից շուտ դուրս գալն էր, ինչը բնականաբար սահմանափակեց էջերի քանակը։
Սակայն, սա միակ պատճառը չէր։ Ամենակարեւոր գործօնը ինտերնետ կապի խափանումն էր, որը տեղի ունեցաւ «Ազգային անվտանգութեան խորհրդի» որոշմամբ։ Այս խափանումը մեր խմբագրութեան համար դարձաւ իսկական «տեղեկատւական պարանոցի կապ»։ Մենք մասամբ զրկւեցինք Հայաստանեան եւ սփիւռքեան լրահոսի մշտական հասանելիութիւնից։ Սա էականօրէն դժւարացրեց մեր օրաթերթի քաղաքական վերլուծութիւնների ճշգրիտ ու հիմնաւորւած պատկերը պահպանելու, ինչպէս նաեւ թերթի ազգային ուղղւածութիւնը չկորցնելու առաքելութիւնը։
Մեր՝ համայնքային լրատւականի դէպքում, երբ կապերն ու թւային հոսքերը խափանւած են, ֆիզիկական թերթի դերը դառնում է ոչ միայն տեղեկատւական, այլ նաեւ համայնքային կենսական գործօն։ Չորս էջով հանդէս գալը, յատկապէս այս պայմաններում, մեր կողմից մէկս միւսի ձեռքը բռնելու փորձ է՝ ցոյց տալով, որ հնարաւորութիւնների սղութեան պայմաններում էլ մեր խմբագրութիւնը կը շարունակի իրականացնել իր առաքելութիւնը:
Հաշւի առնելով ժամանակի եւ օրւայ լարւածութիւնն ու հասկանալի պայմանները՝ մենք ստիպւած ենք լինելու մեր թերթի ծաւալի եւ բովանդակութեան մէջ համապատասխան փոփոխութիւններ կատարել։ Մեր բոլոր հաւատարիմ ընթերցողների ներողամտութիւնը հայցելով այս անխուսափելի փոփոխութիւնների համար, խոստանում ենք, որ փորձելու ենք որակը պահել որպէս գերակայութիւն։
«ԱԼԻՔ» օրաթերթ
