«ԱԼԻՔ» – 2025 թւականի դեկտեմբերին մեկնարկած «Հայոց դպրոցների աշակերտութեան ծնողների ֆուտբոլի 8-րդ մրցաշարը», երկարատեւ ընդմիջումից յետոյ, վերջապէս ճանաչեց իր յաղթող դպրոցը։ Հայրիկների այս՝ ութերորդ մրցաշարը նւիրւած էր Հ. Մ. «Սիփան» միութեան անւանի մարզիկ եւ մարզիչ Զարեհ Մարտիկեանի անմոռաց յիշատակին։
Չորեքշաբթի՝ փետրւարի 4-ի երեկոյեան, Հ. Մ. «Սիփան» միութեան «Նորայր Էլսայեան» մարզադահլիճում, մեծ թւով հանդիսատեսի ներկայութեամբ, միութեան մարզական բաժանմունքի նախաձեռնութեամբ կազմակերպւած մրցաշարի եզրափակիչ հանդիպման համար մրցադաշտ դուրս եկան «Թունեան» եւ «Ն. Գիւլբենգեան» դպրոցների հայրիկները:
Խաղի հիմնական ժամանակում կողմերը արձանագրեցին 2։2 հաշիւը՝ աւարտելով հանդիպումը հաւասար ոչ‑ոքի։ Յաղթողը որոշւեց տուգանային հարւածների ելքով։ Առաջին հինգ հարւածներից յետոյ «Ն. Գիւլբենգեան»-ը գոլային առաւելութիւն ստացաւ, սակայն մրցավարի որոշմամբ վերջին հարւածը կրկնւեց՝ դարպասապահի խախտում արձանագրելու պատճառով: Նա խախտումը թոյլ էր տւել նախքան գնդակի ուղղութիւնը շեղելը։ Սակայն կրկնահարւածի ժամանակ եւս գնդակը չնչին տարբերութեամբ շեղւեց դարպասից։
Արդիւնքում «Ն. Գիւլբենգեան» դպրոցի հայրիկները հռչակւեցին մրցաշարի չեմպիոն, «Թունեան»-ը զբաղեցրեց երկրորդ տեղը, իսկ «Նայիրի‑Սողոմոնեան» – «Ահարոնեան» թիմերի միջեւ երրորդ տեղի համար կայացած հանդիպմանը յաղթանակ տանելով՝ «Նայիրի‑Սողոմոնեան» թիմը դարձաւ բրոնզէ մեդալակիր։
Լաւագոյն դարպասապահի գաւաթին արժանացաւ Ժիլբերտ Բաբախանեանը («Թունեան»), իսկ լաւագոյն ռմբարկու ճանաչւեց Սիոն Թորոսեանը («Ն. Գիւլբենգեան»)։
Ընթացքում Հ. Մ. «Սիփան» միութեան վարչութեան նախագահ Հայկազ Շիրւանեանի կողմից յատուկ յուշանւէրով պարգեւատրւեց մրցաշարի բուժանձնակազմի աշխատանքն իր վրայ վերցրած բուժքոյր Ժասմէն Իսկանդարեանը։
Մեդալաբաշխումից առաջ մրցաշարի պատասխանատու Գեւիկ Մարութեանը Հ. Մ. «Սիփան» միութեան վարչութեան նախագահ Հայկազ Շիրւանեանին յանձնեց Զարեհ Մարտիկեանի յիշատակին պատրաստւած յուշատախտակը՝ այն Մարտիկեանների ընտանիքին փոխանցելու խնդրանքով։ Ելոյթ ունեցաւ նաեւ Թեմական խորհրդի ներկայացուցիչ, արւեստաբան Ժորժ Հայրապետեանը, որը բարձր գնահատեց նման նախաձեռնութիւնների իրականացումը՝ յատկապէս աշակերտութեան շրջանում միութիւնների հետ կապերի ձեւաւորման եւ ամրապնդման տեսանկիւնից։
Յիշեցնենք, որ շուրջ 10 շաբաթ տեւողութեամբ մրցաշարին մասնակցել են «Թունեան», «Նւարդ Գիւլբենգեան», «Նայիրի‑Սողոմոնեան», «Շանթ», «Մարիամեան» (միջնակարգ) դպրոցների, ինչպէս նաեւ, «Արաքս» եւ «Ահարոնեան» մանկապարտէզների հայրիկների թիմերը։
Եզրափակիչ հանդիպումը տեղի ունեցաւ Թ. Հ. Թ. Պատգամաւորական ժողովի, Թեմական եւ Կրթական խորհուրդների ներկայացուցիչների, իրանահայ անւանի ֆուտբոլիստների ներկայութեամբ։
