Խոր մտահոգութեամբ հետեւում ենք Միջին Արեւելքի մէջ ծայր առած պատերազմին: Որոշ փորձագէտներ ներկայ պատերազմը կը նկատեն սկիզբը համաշխարհային երրորդ պատերազմի, իսկ ուրիշներ՝ զինւորական բախումների մի երկար շղթայ: Ինչ մենաբանութիւն էլ տրւի Միացեալ Նահանգների եւ Իսրայէլի կողմից Իրանի դէմ շղթայազերծւած պատերազմական գործողութիւնները փաստօրէն հետզհետէ կը բարդանան, կը սաստկանան ու կը ծաւալւեն՝ ներառելով ամբողջ Միջին Արեւելքը եւ նոյնիսկ շրջանից այնկողմ անցնելու նախանշաններ ցոյց տալով: Անորոշութիւնը հետզհետէ կը խորանայ, քաոսը կը ծաւալւի, մարդկային զոհերի ու վիրաւորների թիւը կը բարձրանայ, ֆիզիքական քանդումները կը տարածւեն ու գաղթականների ալիքը կը ծաւալւի:
Միջին Արեւելքի բոլոր երկրները, առաւել կամ նւազ չափով, ենթակայ են պատերազմի ահաւոր հետեւանքներին՝ ապահովական, ֆիզիքական, տնտեսական, ընկերային, քաղաքական եւ այլ մարզերի ներս: Սակայն, Իրանը եւ Լիբանանը կը շարունակեն կրել պատերազմի անմիջական ու ծանր հետեւանքները:
Ինչպէս ծանօթ է, պատերազմական գործողութիւններին ենթակայ բոլոր երկրներում հաստատւած համայնքներ ունենք: Անցնող օրերին կարողացանք կապ հաստատել մեր առաջնորդների եւ թեմական ու համայնքային պատասխանատուների հետ եւ անհրաժեշտ տեղեկութիւններ ստացանք եւ թելադրութիւններ կատարեցինք: Մեր համայնքների անվտանգութիւնը մեր բոլորի համար հիմնական առաջնահերթութիւն է:
Արդարեւ, յստակ իրողութիւն է, որ շրջանի բոլոր երկրներում բնակութիւն հաստատած մեր համայնքների անդամները տիպար քաղաքացիներ են, իրենց քաղաքացիական պարտականութիւնը լիովին կը կատարեն, հաւատարիմ են իրենց երկրների օրէնքներին եւ միշտ պետութեան կողքին են՝ զօրակից նրանց իրաւունքներին ու շահերին եւ հետամուտ արդարութեան ու խաղաղութեան:
Կաթողիկոսարանը իր բոլոր կարելիութիւնները ի սպաս է դրել մեր համայնքների ծառայութեան: Միաժամանակ սփիւռքի մեր թեմերը, կազմակերպութիւններն ու բարերարները պատրաստ պէտք է լինեն անհրաժեշտութեան պարագային աջակցելու պատերազմի հետեւանքներին ենթակայ մեր համայնքներին:
Կաղօթենք առ բարձրեալն Աստւած, որ իր երկնային խաղաղութեան ծիրանին կամար կապի Միջին Արեւելքի վերեւ եւ փոխադարձ հասկացողութիւնը ամրացնի ազգերի միջեւ եւ մեր ժողովրդի զաւակներին հեռու պահի բոլոր վտանգներից:
Հայրապետական օրհնութեամբ եւ հայրական մեծ սիրով,
Աղօթարար՝
ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ
7 Մարտ 2026
Անթիլիաս-Լիբանան
