Մայիս 1-ի տօնակատարութիւն Հ. Մ. « Սարդարապատ» միութեան յարկի տակ

Մշակ, բանւոր, ռենչպէր, ախպեր,

Արիք, միանանք, յառաջ գնանք …..

Այս տողերը հիմք դարձնելով, այս տարի եւս Հ. Մ. «Սարդարապատ» միութեան Երէցների խումբը կազմակերպել էր միջոցառում, աշխատաւորական մեծ տօն Մայիսի 1-ի առիթով:

Ծրագիրը տեղի ունեցաւ հենց նոյն օրւան Մայիս 1-ին երեկոյեան միութեան կենտրոնատեղիում։ Հրաւիրւած էին Սարդարապատ քաղաքամասի Պատգամաւորական ժողովի պատգամաւոր Արամ Նովշադեանը, քաղաքամասի միութիւնների ներկայացուցիչներ, միութենականներ եւ միութեանը միշտ սատար հանդիսացող անհատներ:

Մեկնարկին օրւայ հաղորդավար Ժասմենա Առաքելեանը բարիգալստեան խօսքից յետոյ համապարփակ գծերով անդրադարձաւ օրւայ թեմային եւ հրաւիրեց միութեան հիմնադիրներից եւ ներկայիս միութեան վարչութեան նախագահ Մուշեղ Ծատուրեանին: Նա ողջունելով աշխատաւորի տօնը անդրադարձաւ Մայիս 1-ին եւ հայ աշխատաւորների դերակատարութեանը ընդհանրապէս եւ իմասնաւորի համայնքային կեանքում: Նա իր խօսքերում բարձր գնահատեց Երէցների խմբի կատարած աշխատանքը եւ ներկաների մասնակցութիւնը, որոնք չեն մերժել իրենց ներկայութիւնը, երկրում տիրող իրավիճակով հանդերձ:

Հրաւիրւեց Երէցների խմբի պատասխանատու Վարդուհի Օրուջեանը եւ ընթացքում վարչութեան կողմից գնահատւեցին Սարդարապատ քաղաքամասի մարմիների պաշտօնեաները համապատասխան յուշանւէրներով։

Ծրագիրը ուրախ մթնոլորտում շարունակւեց միութենական Անուշա Աւանէսեանի կազմակերպւած հաճոյական բաժնով, որը ներկաներին փոխանցեց ուրախ մթնոլորտ:

Վերջում կազմակերպւել էր ընթրիք ընդունելութիւն, որի ընթացքում հրաւիրւեց իր խօսքը փոխանցելու Արամ Նովշադեանը, ով գնահատանքով անդրադրձաւ կազմակերպւած միջոցառման կապակցութեամբ: Ապա երէց միութենականները իրենց յուշերը ներկայացրեցին եւ բոլորը միասին երգեցին ազգային երգեր։

Ծրագիրը աւարտւեց ներկաների բարձր տրամադրութեամբ:

Հ. Մ. «Սարդարապատ» միութեան Հանրային կապ

ԺԱՍՄԵՆԱ ԱՌԱՔԵԼԵԱՆ