Երեքշաբթի, յունիսի 16-ին Իրանի հրշէջ կայանից հիւրաբար «Անի» միութիւն այցելեցին մի խումբ հրշէջներ, որոնց թւում նաեւ իրանահայ հրշէջ Ադդէ Կրասկեանը: Սարդարապատ քաղաքամասում Սրբոց Վարդանանց եկեղեցու տարածքում գտնւող միութեան կենտրոնատեղիում կայացաւ հանդիպումը, որից յետոյ հրշէջները եւ միութենականները «Սահակեան» բարեսիրական կենտրոնի բակում ականատեսը եղան հրշէջների մի շարք աշխատանքների:
Այցին ներկայ էին քաղաքամասի Պատգամաւորական ժողովի պատգամաւորներ, ազգայիններ, միութենականներ ու քաղաքամասի բնակիչներ։
Տէրունական աղօթքով մեկնարկած ծրագրին միութեան նախագահուհի Անուշա Աւանէսեանը իր խօսքերում ընդգծեց, որ հրշէջ լինելը միայն աշխատանք չէ, այլ ծառայութիւն հայրենակիցներին: Նա նշեց, որ հրշէջը խիստ անձնազոհ անձ է, ով վտանգի ենթարկելով իր կեանքը փրկում է վտանգւած անհատներին, որը խիստ գնահատելի է: Նա աւելացրեց, որ «Անի» միութեան նպատակը, այս միջոցառումը կազմակերպելուց հետեւեալն է, որ մասնակիցները մասամբ իրազեկ դառնան թէ՝ հրդեհի դէպքում ինչպիսի մօտեցում պիտի ցուցաբերեն:
Ապա հրաւիրւեցին արտայայտւելու հրշէջներ՝ Մոջթաբա Զէյնբանդը եւ Ադդէ Կրասկեանը, որոնք ներկայացրին հրդեհի պարագային մի շարք անվտանգային կանոններ, որոնց իրագործմամբ մինչեւ հրշէջների հասնելը հնարաւոր կը լինի կանխել աւելի մեծ վնասները: Ապա ներկաները ուղղեցին իրենց հարցումները, որոնց պատասխանում էին մասնագէտ հրշէջները:
Դասախօսութեան աւարտին կազմակերպւեց գործնական բաժին, եւ մասնակիցները հնարաւորութիւն ունեցան մօտիկից ծանօթանալու հրշէջների սարքերին, գործնականօրէն փորձեցին որոշ սարքեր եւ սովորեցին նախնական գործողութիւնները արտակարգ իրավիճակների պարագային։
Կամաւոր հրշէջ Արփա Քարամեանը պատրաստել էր գեղեցիկ աֆիշներ, որ բաժանւեց ներկաներին։
Վերջում «Անի» միութեան նախագահուհին՝ Անուշա Աւանէսեանը շնորհակալութիւն յայտնեց հրշէջ ծառայութեան հրշէջներին օգտակար եւ ուսուցողական այցելութեան համար կարեւորելով նման նախաձեռնութիւնների դերը հանրային իրազեկման եւ անվտանգութեան մշակոյթի զարգացման մէջ։
Վերջում հրշէջներին նւիրւեց ձեռագործ որպէս «Անի» միութեան յուշանւէրը, եւ ձեռագործի վրայ դաջւած էր, (ձեռագործած 125) համարը, որը հրշէջ կենտրոնի հեռախօսահամարն է ի նշան յարգանքի եւ գնահատանքի:
Վերջում տեղի ունեցաւ համեստ ընդունելութիւն։
«Հայ կին» միութեան կից՝ «Անի» միութիւն
