Մոբայլ լրագրութեան դասընթաց՝ Հ. Մ. «Սիփան» միութեան «Պարոյր Սեւակ» գրադարանում

2026 թ. մայիսի 31-ից Հ. Մ. «Սիփան» միութեան նախաձեռնութեամբ եւ միութեան ենթակայութեամբ գործող «Պարոյր Սեւակ» գրադարանում մեկնարկել է «Մոբայլ լրագրութեան եւ ռեպորտաժի այբուբեն» կարճաժամկէտ դասընթացը՝ նախատեսւած պատանի միութենականների համար։

Դասընթացը վարել է լրագրող եւ լուսանկարիչ Մարիանա Աբրահամեանը, որի ղեկավարութեամբ մասնակիցները չորս հանդիպումների ընթացքում ծանօթացել են մոբայլ լրագրութեան հիմնական հմտութիւններին։

Սլայդային ցուցադրումների միջոցով ներկայացւել են հեռախօսով նկարահանում իրականացնելու սկզբունքները, հարցազրոյց վերցնելու մեթոդները, կարճ եւ ազդեցիկ լուր պատրաստելու հնարքները, ինչպէս նաեւ ռեպորտաժի կառուցման հիմունքներն ու իրական պատմութիւն ներկայացնելու ձեւերը։

Դասընթացի գործնական փուլում մասնակից պատանիները այցելել են միութեան պարախմբի փորձին, որտեղ իրականացրել են նկարահանման վարժութիւններ։ Ստացած նիւթերը դասախօսի ուղղորդմամբ վերլուծւել են տեղում՝ շեշտադրելով կադրի ընտրութիւնը, պատմողական կառուցւածքը եւ լրագրական մտածողութիւնը։

Նախագիծը առանձնակի կարեւորութիւն ունի երիտասարդների համար՝ նպաստելով գրագէտ գրառումների, լուր կազմելու եւ հետազօտական աշխատանքի հիմունքներին ծանօթանալուն։

Գրադարանի պատասխանատուների համաձայն, այն միաժամանակ կարող է խթանել ընթերցանութեանը, քանի որ ուսումնասիրման եւ ընթերցման կարողութիւնը դիտարկւում է որպէս լրագրական գրագիտութեան հիմնասիւն։

Դասընթացի մասին տեղեկութիւնը հրապարակւել է միութեան հանրութեան հետ կապերի գրասենեակի կողմից՝ տեղադրւելով միութեան «ԲԱԼԷ»-ի էջում։