Սպահանի հայոց թեմի 18-րդ նստաշրջանի Պատգամաւորական ժողովի 3-րդ հաշւետու նիստի բացումը տեղի ունեցաւ հինգշաբթի եւ ուրբաթ յուլիսի 23-ին եւ 24-ին, Նոր Ջուղայի Հայ Մ. Մ. «Արարատ» միութեան սրահում, մասնակցութեամբ՝ Սպահանի հայոց թեմի առաջնորդական տեղապահ Տ. Արտաւազդ վրդ. Շարոյեանի, Իրանի Իսլամական խորհրդարանում Սպահանի եւ հարաւային իրանահայութեան պատգամաւոր դոկտ. Գեղարդ Մանսուրեանի, Նոր Ջուղայի, Շահինշահրի, Շիրազի եւ Փերիոյ շրջանի պատգամաւորների, հոգեւոր դասի ներկայացուցիչների, ինչպէս նաեւ Հաշւեքննիչ մարմնի, Թեմական ու Կրօնական խորհուրդների, ենթամարմինների ներկայացուցիչների եւ ժողովի կողմից հրաւիրեալ ազգայինների։
Նիստը բացւած յայտարարւեց թեմի առաջնորդական տեղապահ Հայր Սուրբի աղօթքով եւ Պատգ. ժողովի ատենապետ պրն. Նոէլ Մինասեանի խօսքով: Ատենապետն իր արտայայտութեան աւարտին ժողովին հրաւիրեց մէկ րոպէ յոտնկայս լռութեամբ յարգել անցնող մէկ տարւայ ընթացքում տեղի ունեցած պատերազմական գործողութիւնների պատճառով զոհւած բոլոր նահատակների, յատկապէս նորջուղայեցի հայ նահատակի յիշատակին։
Այնուհետեւ խորհրդարանի պատգամաւոր պրն. Մանսուրեանն իր խօսքն ուղղեց ժողովականներին, որտեղ անդրադառնալով երկրում տիրող պատերազմական վիճակին, ընդգծեց մի շարք կարեւոր խնդիրներ՝ ազգային մարմինների օրակարգում ներառւելու համար։
Յաջորդիւ օրակարգի համապատասխան գլուխների ներքոյ Պատգամաւորական ժողովի Դիւանի, Թեմական ու Կրօնական խորհուրդների եւ Հաշւեքննիչ մարմնի զեկոյցների շուրջ տեղի ունեցան հարց ու պատասխաններ եւ հնչեցին ըստ էութեան արտայայտութիւններ գործադիր մարմինների աշխատանքի վերաբերեալ, որոնց արդիւնքում բարձր գնահատւեց նշւած զոյգ մարմինների գործունէութիւնը՝ ի մասնաւորի Թեմական խորհրդի ծաւալուն աշխատանքները կալւածների գործառոյթների բարեկարգման ու փոփոխութեան, իսկ Կրօնական խորհրդի նախաձեռնածը հոգեւոր կեանքի սահուն ընթացքը պահպանելու ուղղութեամբ։ Ժողովականները նաեւ յայտնեցին իրենց տեսակէտներն ու առաջարկները ազգային մարմինների աշխատանքների վերելքի կապակցութեամբ. բոլոր առաջարկները առ ի ուսումնասիրութիւն փոխանցւելու են պատկան յանձնաժողովներին։
Այնուհետեւ տեղի ունեցան Թեմական եւ կրօնական խորհուրդների ընտրութիւնները, իսկ հրաւիրեալ ազգայինների ընտրութեան կէտի ներքոյ միաձայնութեամբ որոշւեց վերընտրել նախկին միամեայ շրջանի հրաւիրեալ անձանց՝ Արբի Բաբայեանին, Վրէժ Տէր-Մարտիրոսեանին, Սարօ Պօղոսեանին եւ դոկտ. Սիլւա Յովսէփեանին։
Հաշւետու նիստն աւարտւեց ուրբաթ երեկոյեան՝ Տ. Արտաւազդ վրդ. Շարոյեանի արտայայտոթեամբ եւ աղօթքով։
Ստորեւ ներկայացնում ենք նորընտիր Թեմական եւ Կրօնական խորհուրդների անձնակազմերը։ Նշելի է, որ Թեմական խորհուրդը կիրակի՝ յուլիսի 26-ի երեկոյեան Պատգ. ժողովի Դիւանի հրաւէրով եւ ներկայութեամբ գումարեց իր անդրանիկ նիստը, ուր կատարեց կազմի պարտականութիւնների բաժանումը։
Թեմական խորհուրդ՝
Աշոտ Դաւթեան՝ ատենապետ
Տարօն Տէր-Մարտիրոսեան՝ փոխատենապետ
Քարոլին Դիլանչեան՝ Ա ատենադպիր
Սաթօ Աւետումեան՝ Բ ատենադպիր
Նապիկ Մելիքեան՝ գանձապահ
Սերժիկ Պարսամեան՝ գոյքապահ
Վրթանէս Մկրտչեան՝ վերահսկիչ հաշւապահ
Կրօնական խորհուրդ՝
Արժ. Տ. Մեսրոպ աւ. քհնյ. Գալստանեան
Արժ. Տ. Խաչատուր քհնյ. Զարգարեան
Վարուժ Մովսիսեան
Գուրգէն Թահմազեան
Մարիետ Աբէլեան
Սպահանի Հայոց Թեմի
Պատգամաւորական Ժողովի Դիւան
