Իրանի Հանր. նախագահի գրասենեակի ընտանիքի եւ կանանց հարցերով տեղակալ դոկտ. Խազալիի այցը՝ ազգային առաջնորդարան

Երկուշաբթի, յունւարի 22-ին, Ամանորի եւ Ս. Ծննդեան տօների առիթով՝ ազգային առաջնորդարան այցելեցին Իրանի Հանր. նախագահի գրասենեակի ընտանիքի եւ կանանց հարցերով տեղակալ՝ դոկտ. Էնսիէ Խազալին եւ իրեն ընկերակցող պատւիրակութիւնը:

Սոյն հանդիպման գլխաւորութեամբ Թեհրանի հայոց թեմի առաջնորդ Տ. Սեպուհ արք. Սարգսեանի ներկայ էին Թեմական խորհրդի ատենապետ ճրտպ. Նորայր Արամեանը եւ նոյն խորհրդի անդամ՝ Անի Միրզախանեանը, Տ. Գրիգորիս քհնյ. Ներսիսեանը, Հ. Մ. «Արարատ» կազմակերպութեան Կենտրոնական վարչութեան նախագահ՝ Սոֆի Ջաղարբէգեանը, «Հայ կին» միութեան վարչութեան նախագահ՝ Արմինէ Բուդաղեանը, Հայ Կանանց բարեգործական միութեան վարչութեան նախագահ՝ Անահիտ Զարգարեանը, Իրան-Իրաք պարտադրեալ պատերազմի Հայ նահատակների եւ անձնուրացների արժէքների պահպանման յանձնախմբի փոխատենապետ Արտուշ Իսկանդարեանը, նահատակ Զօրիկ Մուրադեանի մայրը եւ ազգային առաջնորդարանի դիւանապետ՝ Զօրիկ Կարապետեանը:

Թեմակալ առաջնորդը ողջունելով հիւրերին շնորհակալութիւն յայտնեց իրենց ներկայութեան ու շնորհաւորանքների համար: Նա իր արտայայտութիւններում անդրադառնալով Գազայում եւ Պաղեստինում իրագործւող անմարդկային գործողութիւններին յայտնեց. «Իսրայէլը ոչ միայն Գազայի ու Պաղեստինի ժողովրդի թշնամին է, այլեւ տարածաշրջանի բնակիչների անվտանգութիւնն ու յարմարաւէտութիւնը խաթարելու պատճառը»։ Նա նաեւ նշեց, որ հէնց պատերազմի սկզբից տարբեր պատգամներով դատապարտել է անմեղ ժողովրդի հանդէպ ոճրագործ գործողութիւնները: Սրբազան Հայրը նաեւ ընդգծեց, որ բոլորս յատուկ պարտականութիւն ունենք յարգելու բոլոր այն մարդկանց, ովքեր իրենց կեանքը զոհում են Իրանի անվտանգութեան պաշտպանութեան ճանապարհին։

Իրանի Հանր. նախագահի գրասենեակի ընտանիքի եւ կանանց հարցերով տեղակալ՝ դոկտ. Էնսիէ Խազալին տօնական օրերի առիթով շնորհաւորանքներ եւ բարեմաղթանքներ փոխանցելուց յետոյ ընդգծեց Իրանում կանանց առանձնայատուկ դերը տարբեր ոլորտներում եւ հայ կանանց ներկայացուցիչներին հրաւիրեց համատեղ աշխատանքներ ձեռնարկել փոխհամագործակցութեան ընդլայնման ուղղութեամբ:

Թեմական խորհրդի ատենապետ ճրտպ. Նորայր Արամեանը իր հերթին ողջունելով յարգարժան հիւրերին շնորհակալութիւն յայտնեց այցելութեան եւ ցուցաբերած ուշադրութեան համար։

Ազգային առաջնորդարանի Հանրային կապի գրասենեակ