Իրանը եւ Հայաստանը վճռակամ են ընդլայնել եւ ամրապնդել երկկողմ մշակութային կապերը
«ԱԼԻՔ» – Մշակութային ժառանգութեան, զբօսաշրջութեան եւ ձեռարւեստի նախարար Սէյէդ Ռեզա Սալեհի Ամիրին երէկ՝ սեպտեմբերի 7-ին, հանդիպել է ՀՀ կրթութեան, գիտութեան, մշակոյթի եւ սպորտի նախարար Ժաննա Անդրէասեանի հետ: Հաղորդում է ԻՌՆԱ-ն:
Հանդիպման ընթացքում կողմերը կարեւորել են երկու երկրների համագործակցութեան ընդլայնման հնարաւորութիւնները թանգարանային, արծաթագործութեան, ձեռարւեստի, ինչպէս նաեւ յուշարձանների վերականգնման եւ պահպանման ոլորտներում՝ ընդգծելով այս ուղղութիւններով փորձի փոխանակման ծրագրերի անհրաժեշտութիւնը։ Քննարկւել է նաեւ զբօսաշրջութեան ոլորտում համագործակցութեան հնարաւորութիւնները։
Սալեհի Ամիրին եւ Անդրէասեանը զրուցել են նաեւ երկկողմ հետաքրքրութիւն ներկայացնող այլ հարցերի շուրջ: Ուրւագծւել են փոխգործակցութեան ուղղութիւնները՝ երկկողմ պատրաստակամութիւն յայտնելով իրականացնելու գործօն քայլեր՝ կապերի ամրապնդման եւ նոր նախաձեռնութիւնների իրականացման ուղղութեամբ:
Անդրադարձ է եղել նաեւ ԻՒՆԵՍԿՕ-ի համաշխարհային ժառանգութեան նախնական ցանկում ընդգրւելու համար համատեղ յայտերի ներկայացման հարցին։
Ժաննա Անդրէասեանը նախարար Սալեհի Ամիրիին հրաւիրել է մասնակցելու Երեւանում նոյեմբերի 26-28-ը կայանալիք «Մշակութային խաչմերուկ» միջազգային համաժողովին, որը նւիրւած է ԻՒՆԵՍԿՕ-ի մշակութային ինքնարտայայտման բազմազանութեան պաշտպանութեան եւ խթանման մասին կոնւենցիայի 20-ամեակին։
