Հայաստանի ազգային գրադարանում բացւել է «Իրանի անկիւնը»

Հայաստանի ազգային գրադարանում տեղի է ունեցել «Իրանի անկիւն»-ի բացման հանդիսաւոր արարողութիւնը։

Միջոցառմանը մասնակցել են Հայաստանում Իրանի Իսլամական Հանրապետութեան արտակարգ եւ լիազօր դեսպան Խալիլ Շիրղոլամին, ՀՀ ԿԳՄՍ նախարարի տեղակալ Ալֆրէդ Քոչարեանը եւ Հայաստանի ազգային գրադարանի տնօրէն Աննա Չուլեանը։

Parstoday-ի հաղորդման համաձայն նորաբաց բաժինը ներառում է իրանական գրականութեանը, պատմութեանը, արւեստին եւ իրանագիտութեանը նւիրւած բազմաբնոյթ հրատարակութիւններ, հայ ուսանողներին, հետազօտողներին եւ ընթերցողներին հնարաւորութիւն ընձեռելով աւելի խորութեամբ ծանօթանալու պարսից լեզւին, Իրանի մշակոյթին եւ քաղաքակրթական ժառանգութեանը։

Միջոցառմանը, որին ներկայ էին Իրանի Իսլամական Հանրապետութեան դեսպանութեան ներկայացուցիչները եւ Հայաստանի ազգային գրադարանի ղեկավար կազմը, ընդգծւեց գրքի, թարգմանութեան, գրադարանագիտութեան եւ իրանագիտութեան ոլորտներում երկկողմ համագործակցութեան զարգացման կարեւորութիւնը։

Իրանի դեսպանը նշեց, որ «Իրանի անկիւնի» բացումը կարեւոր քայլ է մշակութային դիւանագիտութեան ամրապնդման եւ երկու ժողովուրդների փոխադարձ ճանաչողութեան խորացման ուղղութեամբ։ Նա յոյս յայտնեց, որ այս բաժինը կդառնայ ուսանողների, հետազօտողների եւ հայ ընթերցողների համար վստահելի աղբիւր՝ Իրանի պատմութեանը, մշակոյթին ծանօթանալու, ինչպէս նաեւ պարսկերէն լեզւին եւ գրականութեանը վերաբերող նիւթերից օգտւելու համար։ Դեսպանն ընդգծեց նաեւ, որ Իրանի դեսպանութիւնը պատրաստ է շարունակաբար համալրել այս հաւաքածուն իրանագիտական նոր հրատարակութիւններով։

«Իրանի անկիւնը» ներառում է շուրջ 907 անւանում պարսկերէն գրքեր եւ այլ նիւթեր՝ պոէզիայի, գրականութեան, գեղարւեստական արձակի, պատմութեան, արւեստի, հասարակութեան եւ իրանական աւանդոյթների վերաբերեալ, ինչը կը յեշտացնի հետազօտողների եւ հետաքրքրւած ընթերցողների հասանելիութիւնը Իրանին առնչւող հաւաստի աղբիւրներին։

Հայկական կողմի ներկայացուցիչները եւս այս նախաձեռնութիւնը գնահատեցին որպէս Հայաստանի եւ Իրանի միջեւ դարաւոր մշակութային կապերի խորհրդանիշ եւ կարեւորեցին գրադարանային, գիտական ու մշակութային համագործակցութեան հետագայ զարգացումը, յատկապէս՝ Իրանի Իսլամական Հանրապետութեան ազգային գրադարանում գործող «Հայ գրականութեան անկեան» հետ փոխլրացնող համագործակցութեան շրջանակում։

Միջոցառման աւարտին իրանական եւ հայկական պատւիրակութիւնների անդամները շրջայց կատարեցին Հայաստանի ազգային գրադարանում՝ ծանօթանալով պարսկերէն գրքերի հաւաքածուին եւ Իրանին վերաբերող փաստաթղթերին։