Գրքի Երեւանեան միջազգային 9-րդ փառատօն. «ԱԼԻՔ» օրաթերթը՝ իրանական տաղաւարում

«ԱԼԻՔ» – ՀՀ Կրթութեան, գիտութեան, մշակոյթի եւ սպորտի նախարարութեան նախաձեռնութեամբ, սեպտեմբերի 4-ից, Երեւանի Հանրապետութեան հրապարակում մեկնարկել է Գրքի Երեւանեան միջազգային 9-րդ փառատօնը, որը շարունակւելու է մինչեւ սեպտեմբերի 6-ը։ Փառատօնի ծրագրում ընդգրկւել է 54 միջոցառում, որոնց մասնակցում են գրողներ եւ հրատարակիչներ 13 երկրից։

Փառատօնի շրջանակում իր տաղաւարով ներկայացւած է նաեւ Իրանը։ «ԱԼԻՔ» օրաթերթը եւս մասնակցում է փառատօնին՝ իրանական տաղաւարում ներկայացնելով օրաթերթը եւ նրա հրատարակչական գործունէութիւնը։

Իրանի դեսպանատան մշակութային խորհրդականը երկրորդ տարին անընդմէջ մասնակցում է միջոցառմանը՝ ներկայացնելու Իրանի հրատարակչական կարողութիւնները, գրական եւ գիտական աշխատանքները, ինչպէս նաեւ հարթակ ստեղծելու իրանցի եւ հայ հրատարակիչների միջեւ համագործակցութեան համար։

Այս նպատակով Իրանի Գրքի եւ գրականութեան տունը, «Ալ-Հոդա» միջազգային հրատարակչութեան հետ համատեղ, կազմակերպել է իրանական տաղաւար, որտեղ ներկայացւած են դասական եւ ժամանակակից գրականութեան, երեխաների եւ պատանիների, պատմութեան, քաղաքակրթութեան, զբօսաշրջութեան եւ Իրանի մշակութային ժառանգութեան վերաբերեալ գրքերի բազմազան հաւաքածուներ։ Տաղաւարում ներկայացւած են նաեւ ռուսերէն եւ հայերէն թարգմանւած ստեղծագործութիւններ։

Այս տարի առաջին անգամ փառատօնի ծրագրում ներառւել է նաեւ արեւմտահայերէն բանաստեղծութեան մրցոյթը, որը միաւորել է աշխարհասփիւռ հայ բանաստեղծներին։ Մրցոյթին ստացւել է 23 յայտ՝ 8 երկրից, իսկ յաղթողի անունը յայտնի կը դառնայ սեպտեմբերի 6-ին։