Ոսկանեան Աստւածաշնչի տպագրութեան 360-ամեակին նւիրւած գիտաժողով կանցկացւի՝ 22 երկրի 110 ներկայացուցչի մասնակցութեամբ
Հոկտեմբերի 8-9-ը Հայաստանի ազգային գրադարանում կանցկացւի «Ժառանգութեան պահպանութիւն՝ յանուն կայուն ապագայի» միջազգային գիտաժողովը՝ նւիրւած հայերէն առաջին տպագիր Աստւածաշնչի 360-ամեակին։
«Այս տարի գիտաժողովն առանձնայատուկ խորհուրդ ունի. լրանում է 1666 թւականին Ամստերդամում հայերէն առաջին տպագիր Աստւածաշնչի տպագրութեան սկզբի 360-ամեակը։ Եթէ 360 տարի առաջ տպագրութիւնը նոր հնարաւորութիւն էր լեզւի, մշակոյթի եւ գիտելիքի պահպանման ու տարածման համար, ապա այսօր՝ արհեստական բանականութեան եւ թւային տեխնոլոգիաների զարգացման պայմաններում, նոյն առաքելութիւնը նոր մարտահրաւէրներ եւ հնարաւորութիւններ է առաջադրում մշակութային ժառանգութեան պահպանութեամբ զբաղւող հաստատութիւններին»,- նշում են Հայաստանի ազգային գրադարանից։
Հաղորդւում է, որ գիտաժողովին կը մասնակցեն աշխարհի 22 երկրներից աւելի քան 110 մասնակիցներ, որոնցից 98-ը հանդէս կը գան մասնագիտական զեկուցումներով։
Երկօրեայ գիտաժողովի աշխատանքները կանցկացւեն զուգահեռ նիստերի եւ աշխատարանների ձեւաչափով՝ Հայաստանի ազգային գրադարանի թամանեանական մասնաշէնքի տարբեր սրահներում։
Գիտաժողովի մասնագիտական քննարկումները կընդգրկեն Աստւածաշունչը՝ որպէս մշակութային ժառանգութիւն, Սփիւռքի ժառանգութեան պահպանումն ու հանրահռչակումը, ժառանգութեան թւային փոխակերպումը, ազգային տպագիր եւ վիզուալ ժառանգութեան պահպանումն ու հանրահռչակումը, մասնագիտական զարգացումն ու կառավարումը, լեզուն՝ ազգային ժառանգութեան պահպանման համատեքստում, ինչպէս նաեւ փաստաթղթերի պահպանութեան, խնամքի եւ վերականգնման արդի խնդիրները։
Առանձին քննարկումներ կը նւիրւեն ԱՊՀ երկրների գրադարաններում ազգային ժառանգութեան պահպանութեան եւ հանրահռչակման փորձին։
Ծրագրի շրջանակում նախատեսւած են նաեւ մասնագիտական աշխատարաններ։ Գիտաժողովի շրջանակում թամանեանական մասնաշէնքի մեծ ցուցասրահում կը բացւի թեմատիկ ցուցադրութիւն, որտեղ կը ներկայացւեն տարբեր տարիների Աստւածաշունչ մատեանների հնատիպ, հայատառ թուրքերէն հրատարակութիւններ։ Ցուցադրութիւնը կը ներկայացնի Հայաստանի ազգային գրադարանի հաւաքածուում պահպանւող տպագիր ժառանգութեան արժէքաւոր նմուշները՝ ընդգծելով դրանց պատմամշակութային նշանակութիւնը։
Գիտաժողովի պատւաւոր խօսնակն է հայագէտ, աստւածաբան, գիտնական եւ հոգեւորական Տ. Լեւոն արք. Զէքիեանը։ Նրա երկարամեայ գիտական, կրթական եւ մշակութային գործունէութիւնը նշանակալի ներդրում ունի հայագիտութեան զարգացման, հայկական մշակութային ժառանգութեան ուսումնասիրման եւ հանրահռչակման գործում։
«Ժառանգութեան պահպանութիւն՝ յանուն կայուն ապագայի» միջազգային գիտաժողովը նպատակ ունի ձեւաւորել մասնագիտական երկխօսութեան եւ միջազգային փորձի փոխանակման հարթակ՝ նպաստելով տարբեր երկրների մասնագէտների միջեւ համագործակցութեան ընդլայնմանը, գիտական ու մասնագիտական կապերի ամրապնդմանը եւ մշակութային ժառանգութեան պահպանութեան ժամանակակից փորձի տարածմանը։
Ոսկանեան Աստւածաշնչի տպագրութեան 360-ամեակին նւիրւած գիտաժողովը միաժամանակ հնարաւորութիւն է վերարժեւորելու հայ տպագիր ժառանգութիւնը։
