Լոյս է տեսել ՀՅԴ պաշտօնաթերթ «Դրօշակ»-ի 2023 թ. 10-րդ համարը
Հոկտեմբերի 24-ից ընթերցողը համացանցի վրայ կարող է գտնել «Դրօշակ»-ի 2023 թւականի 10-րդ համարը։ Հերթական համարի առանցքում Արցախի ու արցախահայութեան հետ կապւած հայ ժողովրդի մեծ ողբերգութեան թեման է։ Համարի առաջնորդողը անդրադարձ է այն մի քանի հիմնական եզրակացութիւններին, որոնք, դժբախտաբար, հաստատւում են կատարւած իրողութեամբ՝ որոնցից մեծ մասի անխուսափելիութեան մասին էլ տարիներ շարունակ ահազանգում էին ազգային ուժերը եւ, որոնք կեղծ լոյսի տակ էր փորձում հանրութեանը ներկայացնել օրւայ բախտախնդիր ղեկավարութիւնը։ Տեղի ունեցած իրադարձութիւնները, փաստերի համադրմամբ, իր յօդւածում լուսաբանում է պատմաբան Անի Մելքոնեանը, միաժամանակ ներկայացնելով այն անելիքները, որոնք Հայաստանը պետական մակարդակով պէտք է ձեռնարկի ոչ միայն Արցախի կորուստները յետ բերելու հնարաւորութիւններ ստեղծելու, այլեւ Հայաստանին սպասւող աղէտները կանխելու նպատակով։ Այս դէպքում եւս հեղինակի եզրակացութիւնը միանշանակ է՝ առանց դաւաճան իշխանութիւնների փոփոխութեան հնարաւոր չէ կանխել, ո՛չ Արցախի եւ ո՛չ էլ Հայաստանի ճակատագրական կորուստները։ Ուշագրաւ եւ կարեւոր է Մարի Յովհաննիսեանի «Արցախում տեղի ունեցածը ցեղասպանութիւն է» յօդւածը։ Մասնագիտական մօտեցմամբ նախ հեղինակը արցախահայութեան հետ կատարւածը բնութագրում է որպէս ցեղասպանութիւն, եւ ապա լուսաբանում է, թէ խնդիրը հայութեան կողմից ինչպիսի բնութագրումներով պէտք է ներկայացւի, մասնաւորապէս, միջազգային ատեաններում` տեղի ունեցածը գնահատելով միջազգային իրաւունքի տեսանկիւնից։
Ամերիկեան հետազօտութիւնների հայկական կենտրոնի` «Դրօշակ»-ի համար գրւած յօդւածն, այս անգամ, հետաքրքիր վերլուծութիւն է անկախացումներից յետոյ Հարաւային Կովկասի նկատմամբ ԱՄՆ որդեգրած քաղաքականութեան վերաբերեալ ինչպէս եւ, գերտէրութեան այսօրւայ իրականացրած քաղաքականութիւնն ու ծրագրերը մասնաւորապէս`Հայաստանի հարցում։
Հոկտեմբերի այս համարում եզրափակւում է Աւօ Գաթրճեանի ծաւալուն յօդւածը Դաշնակցական նշանաւոր հետախոյզ եւ «Նեմեսիս» գործողութեան առանցքային դերակատար, կուսակցական եւ քաղաքական գործիչ Հրաչ Փափազեանի մասին։ Կարծում ենք այս յօդւածը արժէքաւոր է յատկապէս նրանով, որ Հայաստանում, ցաւօք, շատերը չեն ճանաչում այս երեւելի, իր ապրածով հպարտութիւն ներշնչող ազգային գործչին։
2023 թւականի դեկտեմբերի 13-ին մեր գրականութեան ֆիդային՝ Մուշեղ Գալշոյեանը կը դառնար 90 տարեկան։ Հայրենասէր սասունցու եւ հրաշալի գրողի յիշատակին ի յարգանք եւ խոնարհում «Դրօշակ»-ը ներկայացնում է սփիւռքահայ գործիչ, մշակութաբան Մովսէս Հերկելեանի յուշերը մեծ հայի կեանքի եղերական դրւագի մասին։ Ընթերցումներ շարքից ճարտարապետ, գրող, եւ հրապարակագիր, Վրէժ-Արմէնն այս անգամ ներկայացնում է գրող եւ հասարակագէտ Կլոդ Վայանգուրի «Նորազատականութեան վերջը» գաղափարական-իմաստասիրական աշխատութիւնը։ Խորագիրն իսկ յուշում է, որ աշխատութիւնը վերաբերում է մարդկութեան մտքերի, ինչպէս եւ հասարակութիւնների վրայ երկար ժամանակ իշխած ազատականութեան ու, մասնաւորապէս, նորազատականութեան գաղափարախօսութեան բարոյական սպառմանը եւ ճգնաժամին։ Ի դէպ, նման աշխատութիւններ վերջին շրջանում ծնւում են հէնց արեւմտեան աշխարհում, որոնց հետ ծանօթացումը օգտակար կը լինէր նաեւ հայ «ժողովրդավարներին» ովքեր կուրօրէն գնում են գլոբալիզմի ընդհանուր հոսանքի յետեւից, երբ մարդկութիւնը կանգնած է մաշւած եւ իրեն վարկաբեկւած հասարակարգից ձերբազատւելու եւ պարզ մարդու, փոքր ժողովուրդների համար աւելի արդար աշխարհ ստեղծելու ճամբաբաժանի շեմին։
«Դրօշակ»-ի ներկայացւող համարում ընթերցողը կը գտնի այլ հետաքրքրական նիւթեր եւս: «Դրօշակ»-ի 2023 թ. 10-րդ համարը համացանցում կարող էք գտնել droshak.am հասցէի ներքոյ:
