Լոյս է տեսել ՀՅԴ պաշտօնաթերթ «Դրօշակ»-ի 2025 թ․ երկրորդ համարը
Այսօրւանից ընթերցողին է ներկայացւում «Դրօշակ»-ի փետրւարեան համարը։ Բազմազան նիւթերի մէջ ընթերցողի ուշադրութիւնը կարող են գրաւել մասնաւորապէս «Դաշնակցական բեմ», «Գաղափարական» եւ «Պատմութեան լուսարձակ» խորագրերի ներքոյ հրապարակւած յօդւածները։ Օրւայ ներքաղաքական տագնապներին, գործող իշխանութեան քաղաքական կործանարար գծին անդրադարձը կարելի է կարդալ պաշտօնաթերթի «Առաջնորդող» խորագրի ներքոյ։ Ամերիկեան հետազօտութիւնների հայկական կենտրոնը, այս անգամ, «Դրօշակ»-ին տրամադրել է մանրամասն վերլուծութիւն վերջերս ՀՀ եւ ԱՄՆ կառավարութիւնների միջեւ ստորագրւած ԱՄՆ-Հայաստան ռազմավարական գործընկերութեան խարտիայի վերաբերեալ։
Նոր համարում տեղ է գտել պատմաբան Կարէն Խանլարեանի ծաւալուն վերլուծութիւնը, որպէս հիմնաւոր պատասխան Հայաստանի Առաջին Հանրապետութեան եւ Հ. Յ. Դաշնակցութեան նշանաւոր գործիչ Ռուբէն Տէր-Մինասեանի դէմ մամուլում տեղ գտած վարկաբեկիչ յօդւածի։ Ցաւով պէտք է արձանագրել, որ հայ ժողովրդի արժանաւոր զաւակներից մէկի դէմ ցայսօր չեն դադարում բոլշեւիկաշունչ եւ ստահոդ ցեխարձակումները։
«Դրօշակ»-ի նոր համարում Արեւմտահայոց հարցերի ուսումնասիրութեան կենտրոնի տնօրէն Հայկազուն Ալւրցեանը շարունակել է յօդւածաշարը նւիրւած արեւմտահայոց ազատագրական պայքարի շրջանում համշենահայութեան հերոսական դիմադրութեան քիչ ուսումնասիրւած էջերին։
Իր հերթին, պատմաբան Աւետիս Յարութիւնեանը ներկայացրել է ուսումնասիրութիւն Վանի նահանգի հայութեան վիճակի մասին 1908 եւ 1909 թւականներին։ Բնականաբար տեղի ունեցած իրադարձութիւնները անմիջականօրէն շաղկապւում են Երիտթուրքական յեղափոխութեան ազդեցութեան հետ Թուրքիայում ընդհանրապէս եւ, մասնաւորապէս հայութեան կեանքում։
«Դրօշակ»-ի փետրւարեան համարում ընթերցողը կարող է գտնել հետաքրքրական այլ նիւթեր եւս:
«Դրօշակ»-ի 2025 թ. երկրորդ համարը համացանցում կարող էք գտնել droshak.am հասցէի ներքոյ:
Ներբեռնել համարը «Դրօշակ» թիւ 2 2025 թ.
