Լոյս է տեսել ՀՅԴ պաշտօնաթերթ «Դրօշակ»-ի 2025 թ․ վեցերորդ համարը
Ընթերցողին այսօրւանից ներկայացւող «Դրօշակ» պաշտօնաթերթի 6-րդ համարը հետաքրքրական է նիւթերի եւ ասելիքի բազմազանութեամբ։ Իհարկէ բովանդակութեան առանցքում Հայաստանի վերջին շրջանի իրադարձութիւններն են, քաղաքական տագնապալի անցքերի վերլուծութիւնը։ Այս նիւթերի հետ ընթերցողը կարող է ծանօթանալ յատկապէս առաջնորդող յօդւածի եւ Անի Մելքոնեանի հրապարակած նիւթերի միջոցով։
«Դրօշակ»-ի նոր համարում ուշագրաւ են ռուս եւ պարսիկ վերլուծաբանների թարգմանւած յօդւածները, որոնք ուղղակի եւ անուղղակի ձեւով առնչւում են Հայաստանին եւ տարածաշրջանային զարգացումներին։ Հայ ընթերցողի համար դրանք հետաքրքրական են մասնաւորապէս նրանով, որ բացայայտում են մի շարք մեզ յուզող իրողութիւններ։ Որպէս շարունակութիւն ցեղասպանութեան տարիներին համշէնահայութեան մղած հերոսական ինքնապաշտպանական գործողութիւնների Արեւմտահայոց հարցերի ուսումնասիրութեան կենտրոնի տնօրէն Հայկազուն Ալվրցեանն այս անգամ ընթերցողին է ներկայացնում ազատագրական պայքարի համշէնահայ գործիչ եւ նշանաւոր վրիժառու Միսաք Թոռլաքեանի պայքարի պատմութիւնը։
«Դրօշակ»-ի այս համարում ներկայացւած է հերոսական այս պատմութեան առաջին մասը։ «Դրօշակ»-ի խմբագրակազմը ողբերգական անհետացման 40-րդ տարելիցի առիթով իր բարոյական պարտքն է համարել անդրադառնալու ՀՅԴ Բիւրոյի անդամ «Ազդակ-շաբաթօրեակ-Դրօշակ» շաբաթաթերթի խմբագիր Սարգիս Զէյթլեանի կեանքին եւ գործունէութեանը։ Ազգային, կրթական եւ կուսակցական գործիչ Տիգրան Ճիմպաշեանի յօդւածի առանցքում Սարգիս Զէյթլեանը ներկայացւած է որպէս գաղափարախօս, ազգային տեսլականների ջատագով ու մեկնաբան, ով իր յագեցած գործունէութեամբ, հայութեան համար կարեւոր մի ժամանակահատւածում, կատարեց առանցքային դեր՝ հասարակական գիտակցութեան հասունացման, օրախնդիր ազգային հիմնահարցերով հանրութեանը եւ յատկապէս երիտասարդութեանը ոգեշնչելու հարցում։ Սրա կողքին, անշուշտ, տաղանդաւոր գործիչը հսկայական դերակատարութիւն ունեցաւ կազմակերպական, կրթական գործում եւ առհասարակ բազմաճիւղ իր գործունէութեան բոլոր ոլորտներում։
Սփիւռքահայ մամուլի ուսումնասիրութեամբ զբաղւող Մարիամ Յովսէփեանը հետաքրքրական անդրադարձ է կատարել 1965 թւականի լիբանանահայ երեք կուսակցութիւնների պաշտօնաթերթերին։ Այս ուսումնասիրութեան ճանապարհով ընթերցողին են ներկայացւում յետցեղասպանական տարիներին հայութեան նկատմամբ թուրքական քաղաքականութեան նոր դրսեւորումները, ինչպէս եւ դարի մեծագոյն ոճրագործութեան դէմ Հայ Դատի ուղղութեամբ ծաւալւած պայքարը։
Ինչպէս նշեցինք «Դրօշակ»-ի ներկայ համարը հարուստ է բազմազան նիւթերով ինչում ընթերցողը կը համոզւի:
«Դրօշակ»-ի 2025 թ. վեցերորդ համարը համացանցում կարող էք գտնել droshak.am հասցէի ներքոյ:
Ներբեռնել համարը «Դրօշակ» թիւ 6, 2025 թ.
