Լոյս է տեսել ՀՅԴ պաշտօնաթերթ «Դրօշակ»-ի 2025 թ․ 12-րդ համարը
2025 թւականի վերջին օրերին եզրափակիչ համարով տարին է փակում նաեւ «Դրօշակ» պաշտօնաթերթը։ Պաշտօնաթերթն այս համարում որոշակի դիտանկիւնով փորձել է նաեւ փակել քաղաքական տարին՝ լայն քաղաքական ընդգրկումով։ Այսօրւայ համաշխարհային քաղաքական դիմանկարի ուրւագծի փորձ է համարի «Առաջնորդող»-ը։
Քաղաքագէտ Վահէ Դաւթեանը ներկայացնում է Հայաստանի էլեկտրացանցերի «ոդիսականը» աշխարհաքաղաքական չափումների ընդգրկուն շրջագծում։ Մոսկւայի Սեւծովեան-Կասպիական տարածաշրջանի ինստիտուտի գիտաշխատող Սարգիս Սարգսեանը «Թրամփի Զանգեզուրեան երթուղու» վերաբերեալ առաջարկում է ծանօթանալ արեւմտեան, թուրքական, ռուսական, արաբական լրատւամիջոցներով արտայայտւած տեսակէտներին եւ գնահատականներին։ Տւեալ թեմայի իւրօրինակ շարունակութիւնն է Ամերկեան հետազօտութիւնների հայկական կենտրոնի ուսումնասիրութիւնը, Անդրկովկասում ամերիկեան քաղաքականութեան նկատւող ակտիւութեան վերաբերեալ, ինչպէս եւ վերջինիս հաւանական ազդեցութիւնը տարածաշրջանային ուժերի քաղաքականութեան վրայ։
Թեհրանի «Ալիք» օրաթերթի գլխաւոր խմբագիր Արամ Շահնազարեանը «Դրօշակ»-ի համար գրւած վերլուծութեամբ անդրադարձել է 2025 թւականին Իրանի հետ եւ Իրանի առանցքի շուրջ տեղի ունեցած աշխարհաքաղաքական անցուդարձերին։ Միաժամանակ անդրադարձ է կատարւել Իրանի ունեցած եւ զարգացող փոխյարաբերութիւններին տարածաշրջանային շահագրգիռ տէրութիւնների հետ։
Տարւայ եզրափակիչ այս համարին տարածաշրջանային իրողութիւնների եւ զարգացումների վերաբերեալ վերլուծութիւն է տրամադրել նաեւ Բէյրութի «Ազդակ» օրաթերթի գլխաւոր խմբագիր Շահան Գանտահարեանը։ Խօսելով տարածաշրջանային մեծ քարտէզի եւ նրանում տեղի ունեցող գործընթացների մասին չի կարելի անտեսել այստեղ ձեւաւորւած ու թափ հաւաքող մեծ դաշինքները։ Քաղաքագէտ Արփի Աբրահամեանը «Դրօշակ»-ի նախորդ համարում հանդէս եկաւ ԲՐԻԿՍ-ին վերաբերող յօդւածով։ Այս անգամ նա պաշտօնաթերթին տրամադրել է տարածաշրջանային երկրորդ հզօր դաշինքը՝ Շանհայի համագործակցութեան կազմակերպութիւնը ներկայացնող վերլուծութիւն։
«Դրօշակ»-ի սոյն համարում անդրադարձ կայ կարեւոր տարեթւերի՝ Հ. Յ. Դաշնակցութեան 135-ամեակին եւ ՀՅԴ «Նիկոլ Աղբալեան» Ուսանողական միութեան 35-ամեակին։ Համաստեղի ուշագրաւ յօդւածն է վերահրապարակւել Գարեգին Նժդեհի մահւան 70-րդ տարելիցի առիթով։
«Դրօշակ»-ի 2025 թ. 12-րդ համարը համացանցում կարող էք գտնել droshak.am հասցէի ներքոյ:
Ներբեռնել համարը «Դրօշակ» թիւ 12, 2025 թ.
