Լոյս է տեսել ՀՅԴ պաշտօնաթերթ «Դրօշակ»-ի 2023 թ. 12-րդ համարը
Դեկտեմբերի 27-ին էլեկտրոնային հարթակում հրապարակւել է «Դրօշակ»-ի տարեվերջեան համարը: Տրամաբանական է, որ այս համարը ունի արդէն անցեալ դարձող անհանգիստ տարին ամփոփոխ բովանդակութիւն: Եթէ համարի «Առաջնորդող»-ում շեշտադրւում է քաղաքական իրադարձութիւնների խորապատկերին Հայաստանի իշխանութիւնների իրականացրած գործունէութիւնն ու դրսեւորած քաղաքական վարքը, ապա Անի Մելքոնեանի յօդւածը անդրադարձ է հայութեան համար դրամատիկ ու ողբերգական եղելութիւններով հարուստ ժամանակահատւածի կարեւոր իրադարձութիւններին:
Քաղաքագէտ Հրանտ Մելիք-Շահնազարեանը քաղաքական իրականութեանն անդրադառնում է բանակցային գործընթացների տեսանկիւնից: Քաղաքագէտի եզրակացութիւնն է, որ սպասւում է ոչ պակաս յագեցած ու լարւած տարի, եւ թէ այն ինչ ազդեցութիւն կունենայ Հայաստանեան ու Արցախեան խնդիրների վրայ մեծապէս պայմանաւորւած կը լինի նրանով, թէ Հայաստանի օրւայ ղեկավարութիւնը ինչպէս կը դրսեւորի իրեն հայութեան կենսական շահերը շօշափող՝ գալիք մարտահրաւէրներին դէմ-յանդիման:
Իրանագէտներ Լիանա Պետրոսեանն ու Նարէ Գէորգեանը անդրադարձել են համապատասխանաբար Հայաստան-Ռուսաստան-Իրան եւ Հայաստան-Ադրբեջան-Թուրքիա փոխյարաբերութիւններին եւ երկրների միջեւ տեղի ունեցած գործընթացներին անցնող տարւայ ընթացքում:
Արեւելագէտ Արմէն Պետրոսեանի ուշադրութեան առանցքում է Մերձաւոր Արեւելքի 2023 թւականը: Ինչպէս յայտնի է այս տարածաշրջանում նոյնպէս տեղի ունեցան որքան բուռն նոյնքան եւ անակնկալ իրադարձութիւններ: Ի դէմս Իսրայէլա-պաղեստինեան պատերազմի տարածաշրջանը շարունակում է յիշեցնել եռացող կաթսայ՝ կանխատեսելի ու ամենաանկանխատեսելի զարգացումներով:
Ներազգային կեանքի համար տարին յատկանշական էր մասնաւորապէս եւ նրանով, որ լրացաւ ազգային կեանքում իր վաստակած պատւաւոր տեղը հաստատած «Համազգային» հայ կրթական եւ մշակութային միութեան 95-ամեակը: Թէեւ Արցախին պատուհասած ողբերգութիւնն ու Հայաստանի շուրջ տեղի ունեցող մտահոգիչ երեւոյթներն իրենց մռայլ շուքն էին նետել համահայկական ընդհանուր կեանքի վրայ, այնուամենայնիւ Հայաստանում եւ Սփիւռքի տարբեր գաղթօջախներում հայութիւնն անդրադարձաւ այս տարեդարձին: «Համազգային»-ի 95-ամեակին է անդրադարձել նաեւ ճարտարապետ, գրող եւ խմբագիր Վրէժ-Արմէն Արթինեանը: «Դրօշակ»-ին այս անգամ տրամադրած նրա յօդւածը արժանաւորում է «Համազգային»-ի հիմնադրութեանն ու հիմնադիրներին, ինչպէս եւ անդրադարձ է ազգային այս կարեւոր կառոյցի ներկային ու նրա չընդհատւող առաքելութեանը:
Դշնակցութեան աւագագոյն պաշտօնաթերթի այս համարում տեղ են գտել նաեւ բնապահպանական, պատմական եւ գաղափարական բնոյթի ուշագրաւ այլ յօդւածներ:
«Դրօշակ»-ի 2023 թ. 12-րդ համարը համացանցում կարող էք գտնել droshak.am հասցէի ներքոյ:
