Կառավարութեան շէնքում նստած է ոչ թէ վարչապետ, այլ անմահ Օտեանի Փանջունին
«ԱԼԻՔ» – Դեկտեմբերի 5-ին Հրապարակ TV-ի «Հինգշաբթի» հաղորդաշարի հիւրն էր մամուլի գործիչ, հրապարակախօս Վաչէ Բրուտեանը: Հարցազրոյցում անդրադարձ է կատարւել տարածաշրջանային խնդիրներին, ի մասնաւորի՝ Սիրիայի եւ այդ երկրի հայահոծ շրջանի՝ Հալէպի կացութեանը,՝ կապւած վերջին օրերին ահագնացած ռազմական գործողութիւնների հետ: Վաչէ Բրուտեանը սիրիական նոր տագնապը, ուկրաինական պատերազմը եւ Հարաւային Կովկասում ստեղծւած կացութիւնը դիտարկել է նաեւ ԱՄՆ-ում տեղի ունեցած նախագահական ընտրութիւնների համապատկերի վրայ, չբացառելով, որ ԱՄՆ հեռացող վարչակազմը այս ամէնը որպէս «ժառանգութիւն» թողեց նոր նախագահի կառավարութեանը:
«Տւեալները ցոյց են տալիս, որ ամերիկեան գործող վարչակազմը միտւած է համաշխարային թատերաբեմում այնպիսի քայլեր ձեռնարկել, որոնք, կարծես, նպատակ ունեն կատարւած իրողութեան առջեւ կանգնեցնել Թրամփի վարչակազմին: Նոյն միտումն է թէ Ուկրաինայի պարագայում, թէ Հարաւային Կովկասի պարագայում եւ թէ նաեւ Սիրիայի պարագայում»,- նշել է Վաչէ Բրուտեանը:
Շարունակելով սիրիական խնդրի արծարծումը՝ Վաչէ Բրուտեանը նաեւ հարցադրում է կատարել, թէ ինչպէս պատահեց, որ Սիրիայում ամէն տեսակ ներկայութիւն ունեցող Ռուսաստանը (ցամաքային, ծովային եւ օդա-տիեզերական) «յանկարծակիի» եկաւ ահաբեկչական խմբաւորումների նոր գրոհից: «Ինձ համար տրամաբանական չէ, որ ռուսական կողմը անտեղեակ էր սպասւող յարձակմանը: Ես աւելի հակւած եմ մտածելու, որ այնտեղ ռուս-թուրքական քաղաքական առեւտրի նոր առիթ գոյացաւ, այն իմաստով, որ Ռուսաստանը Թուրքիային թոյլ տւեց առանց իր կարմիր գծերը հատելու «որոշ բաներ» վերցնել Սիրիայում, բայց փոխարէնը մեզ ուրիշ տեղ պէտք է «որոշ բաներ» տաք: Կը դժւարանամ ասել, թէ որն է այդ «ուրիշ տեղը», բայց, ամենայն հաւանականութեամբ դա Հարաւային Կովկասն է»,- ասել է Վաչէ Բրուտեանը:
Նա խօսել է նաեւ Հայաստանի արտաքին եւ ներքին քաղաքական խնդիրների, անվտանգային համակարգի անմխիթար վիճակի, երկրի պաշտպանութեան եւ անվտանգութեան ողնասիւնը հանդիսացող բանակի հանդէպ ՀՀ իշխանութիւնների ցուցաբերած անտարբերութեան մասին:
