Ալերգոլոգ. Աշխարհում ամէն երրորդ մարդը տառապում է այս կամ այն ալերգիկ հիւանդութեամբ.
Վերջին տարիներին ամբողջ աշխարհում աճել է ալերգիկ հիւանդութիւնների տարածւածութիւնը, Հայաստանն էլ բացառութիւն չէ: Այս մասին NEWS.am Medecine-ի հետ զրոյցում ասաց Երեւան քաղաքի գլխաւոր ալերգոլոգ Կրիստինա Ջամալեանը՝ նշելով, որ դրա պատճառները տարբեր են, սակայն գլխաւոր պատճառը մթնոլորտի աղտոտւածութիւնն է:
«Աշխարհում ամէն երրորդ մարդը տառապում է այս կամ այն ալերգիկ հիւանդութեամբ. դա սարսափելի ցուցանիշ է: Ամենատարածւած ալերգիկ հիւանդութիւնը քթաբորբն է: Ամէն օր 15-20 հիւանդ ենք ունենում՝ շնչառական ուղիների ալերգիկ ախտահարումով»,-ասաց ալերգոլոգը:
«Օդի աղտոտւածութեան հետեւանքով յատկապէս տարածւում են քթաբորբը, ասթմատիկ բրոնխիտը, բրոնխիալ ասթման, ախտահարւում են ե՛ւ վերին, ե՛ւ ստորին շնչուղիները: Ալերգիաները արտայայտւում են նաեւ մաշկային երեւոյթներով՝ ալերգիկ կոնտակտային մաշկաբորբի տեսքով: Օդի ախտոտւածութիւնը նպաստում է բոլոր ալերգիկ հիւանդութիւնների տարածմանը: Գարնան եւ ամռան ամիսներին առաւել նկատելի է արտայայտւածութիւնը, բայց աշնանն ու ձմռանը դրանց տարածումը նոյնպէս հնարաւոր է»:
Կրիստինա Ջամալեանի խօսքով, արդիւնաբերական եւ շինարարական փոշին եւս ալերգիայի սրման գլխաւոր պատճառներից են: Այդ պատճառով եւրոպական երկրներում խիստ սահամանափակումներ են դրւում սննդային եւ արդիւնաբերական ցանկացած ոլորտում, որովհետեւ քիմիական թափոնները, ամենուր իրականացւող շինարարութիւնն ազդում են օրգանիզմի վրայ:
«Խնդրի լուծման տարբերակներից մէկը արդիւնաբերական եւ շինարարական նորմերի վերանայումն է: Շինհրապարակները պէտք է փակւած լինեն, ինչի արդիւնքում փոշին հնարաւորինս քիչ կը տարածւի: Շատ դէպքերում արդիւնաբերական թափոնների արտանետումը իրականացւում է բնութեան մէջ, պէտք է նաեւ այդ նորմերը վերանայւեն»,-ասաց նա:
