«ԱԼԻՔ» – Իսլ. յեղափոխութեան առաջնորդ այաթ. Սէյէդ Ալի Խամենէին երէկ՝ յուլիսի 7-ին հանդիպել է 13-րդ կառավարութեան անդամների հետ:
Հանդիպման ընթացքում, Իսլ. յեղափոխութեան առաջնորդը ժողովրդի զանգւածների խնդիրների լուծմանն ուղղւած շարունակական ջանքերի գործադրումը, ներքին կարողութիւնների հանդէպ խորը հաւատքը, կրօնական եւ յեղափոխական դիրքորոշումների արտայայտման գործում յստակութիւնը, անխոնջ աշխատանքը, չյուսահատւելը, արտաքին քաղաքականութեան ոլորտում փոխգործակցութեան եւ արժանապատւութեան սկզբունքների պահպանումը, խոշոր նախագծերի իրականացմանը յատուկ ուշադրութիւն դարձնելը, խոնարհութիւնը, հանդուրժողականութիւնը եւ բարոյականութիւնը համարել է նահատակ նախագահ Ռէյիսիի անձնական եւ աշխատանքային ընդգծւած յատկութիւնները:
Այաթ. Խամենէինի 13-րդ կառավարութիւնը բնութագրեց որպէս «աշխատանքի, յոյսի եւ շարժման» կառավարութիւն եւ յիշեցրեց, որ նահատակ նախագահը իսկապէս լաւատես էր ապագայի նկատմամաբ եւ վճռակամ էր հասնելու նախանշւած բոլոր նպատակներին:
«Ռէյիսին նաեւ գործնականում հաւատարիմ մնաց իր ասածներին: Օրինակ՝ առաջին հարցազրոյցում նրան հարց տւեցին. «Դուք ինչ-որ երկրի հետ յարաբերւելո՞ւ էք», նա պատասխանեց՝ «ոչ» եւ մինչեւ վերջ մնաց այս յստակ գծում»,- ասել է Իսլ. յեղափոխութեան առաջնորդը՝ շեշտելով, որ յատուկ ընդգծել է նահատակ Ռէյիսի յատկանիշերը, որպէսզի դրանք պահպանւեն պատմութեան մէջ՝«Եւ բոլորն իմանան, որ հնարաւոր է այս ինտելեկտուալ, մարդկային եւ գործնական յատականիշները որպէս երկրի նախագահի համատեղել, եւ գործնականում հետեւել դրանց»:
Այաթ. Խամենէին նաեւ բարձր է գնահատել 13-րդ կառավարութեան բոլոր անդամների գործունէութիւնը եւ նահատակ նախագահի հետ նրանց սերտ համագործակցութիւնը՝ նշելով. «Բնականաբար, առանց ձեր համագործակցութեան այդ գործունէութիւնը հնարաւոր չէր լինի»:
Իր խօսքերի աւարտական բաժնում Իսլ. յեղափոխութեան առաջնորդը եւս մէկ անգամ երախտագիտութիւն է յայտնել ժողովրդին, իշխանութեան տարբեր օղակների ներկայացուցիչներին, Ներքին գործերի նախարարութեանը, լրատւամիջոցներին, ոստիկանութեանը եւ անվտանգութեան ուժերին՝ նախագահական ընտրութիւնները բարձր մակարդակով եւ առանց միջադէպերի անցկացնելու համար:
