Ինսուլին է մշակւել, որն արձագանգում է արեան մէջ շաքարի մակարդակի փոփոխութեանն իրական ժամանակում
Գիտնականները մշակել են ինսուլին, որն արձագանգում է արեան շաքարի մակարդակի փոփոխութեանն իրական ժամանակում եւ կարող է յեղափոխութիւն անել ամբողջ աշխարհում 1-ին տիպի շաքարախտով տառապող միլիոնաւոր մարդկանց բուժման մէջ: Ներկայումս հիւանդները ստիպւած են սինթետիկ ինսուլին ներարկել օրական մինչեւ 10 անգամ՝ գոյատեւելու համար,- գրում է The Guardian-ը։
Արեան շաքարի բարձր եւ ցածր մակարդակների միջեւ մշտական տատանումները կարող են յանգեցնել կարճաժամկէտ եւ երկարաժամկէտ ֆիզիկական առողջութեան խնդիրների, իսկ կայուն մակարդակի պահպանման համար պայքարը կարող է ազդել նաեւ նրանց հոգեկան առողջութեան վրայ: Գիտնականները գտել են լուծում, որն ըստ մասնագէտների այնքան մօտ է 1-ին տիպի շաքարախտի բուժմանը, որքան ցանկացած դեղորայքային թերապիա. խելացի ինսուլին, որը քնած է օրգանիզմում եւ սկսում է գործել միայն անհրաժեշտութեան դէպքում:
ԱՄՆ-ից, Աւստրալիայից եւ Չինաստանից գիտնականները յաջողութեամբ մշակել են նոր ինսուլիններ, որոնք ընդօրինակում են օրգանիզմի բնական արձագանգը արեան շաքարի մակարդակի փոփոխութեանը եւ անմիջապէս արձագանգում իրական ժամանակում: Ստանդարտ ինսուլինները կայունացնում են արեան շաքարի մակարդակը օրգանիզմ ներարկելու դէպքում, բայց իրենց աշխատանքը, որպէս կանոն, չեն կարող օգնել հետագայ տատանումների դէպքում։
Սա նշանակում է, որ հիւանդներին յաճախ անհրաժեշտ է նորից ինսուլին ներարկել ընդամէնը մի քանի ժամ յետոյ: Գլիւկոզայի նկատմամբ զգայուն նոր ինսուլինները (GRIs) սկսում են գործել միայն այն ժամանակ, երբ արեան մէջ որոշակի քանակութեամբ շաքար կայ, որպէսզի կանխեն հիպերգլիկեմիան (արեան մէջ գլիւկոզայի բարձր մակարդակ): Նրանք նորից անգործունեայ են դառնում, երբ շաքարի մակարդակն ընկնում է որոշակի կէտից՝ դրանով իսկ խուսափելով հիպոգլիկեմիայից (արեան մէջ գլիւկոզայի ցածր մակարդակ): Ապագայում հիւանդները կարող են ինսուլինի կարիք ունենալ միայն շաբաթը մէկ անգամ, նշում են մասնագէտները:
