Գիտնականները բացայայտել են արեան նոր խումբ հետազօտութիւնների 50 տարիներից յետոյ

Գիտնականներին ուղիղ յիսուն տարի պահանջւեց, որպէսզի պարզէն արեան անյայտ խմբի ֆենոմէնը։ Վերջապէս յայտարարւել է, որ փնտրտուքներն աւարտւել են, եւ արեան հազւադէպ խումբը նոյնականացւել է, դրա տարբերակիչ նշանը պարզւել եւ ամրագրւել է պաշտօնապէս։

Հետազօտութիւնը մեկնարկել էր դեռ 1972 թ., տեղեկացրել է Planet Today-ը։ Այն ժամանակ յղի կնոջ արեան մէջ չէր յաջողւել յայտնաբերել կոնկրետ մոլեկուլ, որը պէտք է առկայ լինի արեան բոլոր կարմիր բջիջներում։ 50 տարի անց այս մոլեկուլային անոմալիան հիմք է հանդիսացել Մեծ Բրիտանիայի եւ Իսրայէլի գիտնականների համար՝ նրանց թոյլ տալով նկարագրել մարդկանց արեան խմբերի նոր համակարգը։

Ինչպէս տեղեկացրել է Blood-ը, գիտնականներն ասել են, որ մարդիկ իրականում ունեն աւելի քան չորս յայտնի արեան խմբեր։ Դրանց բաժանումը հիմնւած է տարբեր սպիտակուցների եւ շաքարների վրայ, որոնք տեղայնացւած են բջիջների մակերեսին: Օրգանիզմն օգտագործում է այս հակագենային մոլեկուլները՝ տարբերելու «իւրային» եւ «օտար» բջիջները:

Պարզւել է, որ մարդկանց աւելի քան 99.9 տոկոսն ունի է AnWj հակագեն: Բայց հէնց դա էլ հիւանդի արեան մէջ չկար 1972 թ.։ Այն սովորաբար տեղակայւած է միելին-լիմֆոցիտային սպիտակուցում:

Այս ընկալումն օգնել է գիտնականներին յայտնաբերել արեան նոր խումբ՝ MAL: Այն անւանւել է փոքրիկ սպիտակուցի պատւին, որի յատկութիւնները դժւարացնում էին նոյնականացումը: Սակայն այժմ հետազօտողները պարզել են այս սպիտակուցի առանձնայատկութիւնները:

News.am