Կէսժամանոց ֆիզիկական ակտիւութիւնը բարելաւում է ճանաչողական ունակութիւնները
Լոնդոնի համալսարանական քոլեջի գիտնականները յայտնաբերել են, որ իւրաքանչիւր լրացուցիչ 30 րոպէ ֆիզիկական ակտիւութիւնը կարող է բարելաւել ճանաչողական ունակութիւնները: Դրա մասին գրում է բրիտանական The Guardian պարբերականը։
Հետազօտութեանը մասնակցել են դեմենցիայից կամ այլ ճանաչողական խանգարումներից զերծ 50-83 տարեկան 76 չափահասներ: Մասնակիցներն ութ օր շարունակ ակտիւութեան եւ քնի մոնիտորինգի սարքեր են կրել եւ յիշողութեան, ուշադրութեան, տեղեկութեան մշակման արագութեան եւ այլ ճանաչողական գործառոյթների վերաբերեալ ամենօրեայ թեստեր են յանձնել:
Արդիւնքները ցոյց են տւել, որ օրական չափաւորից մինչեւ ինտենսիւ ֆիզիկական ակտիւութեան իւրաքանչիւր լրացուցիչ 30 րոպէն յաջորդ օրը 2-5%-ով բարելաւում է յիշողութեան ցուցանիշները: Քնի որակը միաժամանակ կարեւոր դեր է խաղացել. առնւազն վեց ժամ հանգստանալն ուժեղացրել է ակտիւութեան արդիւնքը՝ բարենպաստօրէն անդրադառնալով դիպւածային յիշողութեան եւ արձագանգման արագութեան վրայ:
Հետազօտութեան հեղինակ դոկտոր Միքայէլա Բլումբերգը պարզաբանել է, որ ֆիզիկական ակտիւութիւնը բարելաւում է ուղեղի աշխատանքը՝ խթանելով արեան շրջանառութիւնը եւ ճանաչողական գործառոյթին աջակցող նեարդային հաղորդիչների արտազատումը:
Բացի դրանից, գիտնականները նշել են երկարատեւ նստակեաց ապրելակերպի բացասական հետեւանքները։ Հետազօտութիւնը ցոյց է տւել, որ իւրաքանչիւր լրացուցիչ կէս ժամ նստելը նւազեցնում է մասնակիցների աշխատանքային յիշողութեան միաւորները:
