Կեանքի տեւողութիւնն առնւազն հինգ տարով աւելացնելու հասարակ միջոց է բացայայտւել

Ամբողջ աշխարհի հետազօտողները հազարաւոր տարիներ փորձում են գտնել մի բան, որը մարդկանց հնարաւորութիւն կընձեռի յաւերժ ապրել կամ գոնէ զգալիօրէն մեծացնել կեանքի տեւողութիւնը: Չնայած բժշկութեան եւ տեխնոլոգիաների զարգացմանը՝ մենք դեռ հեռու ենք յաւերժական կեանքից, ընդսմին գիտնականները կեանքի  տեւողութիւնը առնւազն 5 տարով աւելացնելու արդիւնաւէտ միջոց են յայտնաբերել,- գրում է Futurism-ը։

Ամերիկացի գիտնականների անցկացրած նոր հետազօտութիւնը, որը հրապարակւել է British Journal of Sports Medicine բժշկագիտական հանդէսում, ցոյց է տւել, որ 40-ից բարձր չափահասները իրենց կեանքը 5 տարով կարող են երկարացնել, եթէ բնակչութեան 25%-ի չափով զբաղւեն սպորտով:

Հետազօտութեան ընթացքում գիտնականները ստեղծել են կանխատեսող մոդել՝ գնահատելու ֆիզիկական ակտիւութեան օգուտը կեանքի տեւողութեան համար, հաղորդում է Focus-ը։ Հետազօտողների բացայայտումները բազմիցս հաստատում են այն համոզմունքը, որ կանոնաւոր վարժութիւններն առողջ ծերացման բանալին են:

Միեւնոյն ժամանակ, հետազօտութեան հեղինակները նշում են, որ իրենց ապշեցրել է կեանքի տեւողութեան վրայ սպորտի ազդեցութեան աստիճանը։ Գիտնականները պարզել են, որ ֆիզիկական ակտիւութիւնը զգալիօրէն աւելի մեծ օգուտ է տալիս առողջութեանը, քան նախկինում ենթադրւում էր: Թիմը միաժամանակ նշում է, որ իրենց նոր աշխատանքում ֆիզիկական վարժութիւնների առողջութեան օգուտները չափելու աւելի ճշգրիտ միջոց է կիրառւել:

Կանխատեսող մոդելի ստեղծման համար հետազօտողները 40 տարեկանից բարձր մարդկանց առողջութեան ազգային հետազօտութիւնից հանել են ակտիւութեան յետագծման տւեալները: Արդիւնքները ցոյց են տալիս, որ կեանքը երկարացնելու համար անհրաժեշտ է օրական առնւազն 160 րոպէ շարժւել՝ ժամում շուրջ 4,8 կիլոմետր արագութեամբ։

Հետազօտութեան արդիւնքները ցոյց են տալիս, որ այս պարզ տեխնիկան իրականում կարող է մեծացնել կեանքի տեւողութիւնը 78,6-ից մինչեւ 84 տարի՝ վեց տարով աւելի, քան ԱՄՆ-ում կեանքի միջին տեւողութիւնը: Մինչդեռ, եթէ ամերիկացիների ամենաքիչ ակտիւ քառորդը նոյն տեմպերով քայլեր օրական եւս երկու ժամ, նրանց կեանքի տեւողութիւնը եւս 11 տարով կաճի։

Հետազօտութեան հեղինակները նշում են, որ իրենց աշխատանքը դիտական հետազօտութիւն է, ինչը նշանակում է, որ պատճառահետեւանքային կապ հաստատելը պարզապէս անհնար է։ Ընդսմին, մարզւելը վնաս չէ, եթէ բժիշկները խորհուրդ չեն տալիս ակտիւութիւնը սահմանափակել:

Հետազօտողները նաեւ նշում են, որ պարտադիր չէ, որ ֆիզիկական ակտիւութիւնը լինի բացառապէս ժամերով քայլելու ձեւով, քայլելը կարող է փոխարինւել նաեւ կարճատեւ, ինտենսիւ մարզումներով:

Ընդորում, կան բազմաթիւ խոչընդոտներ, որոնք խանգարում են մարդկանց իրականացնել իրենց ուզած վարժութիւնը, ինչպէս խոստովանում են հետազօտողները: Հասարակական մասշտաբով լուծումը չի կարող անպայման նշանակել մարդկանց մարզասրահ հրաւիրել: Գիտնականները կարծում են, որ ակտիւ սպորտը խրախուսելու համար քաղաքային ենթակառուցւածքների փոփոխութիւնը կեանքի տեւողութեան բարձրացման վրայ կարող է միաժամանակ դրական ազդեցութիւն ունենալ:

News.am