Ե՞րբ է ջուրը յայտնւել Երկրի վրայ

«ԱԼԻՔ» – Ռատգերսի համալսարանի (ԱՄՆ) գիտնականների նոր ուսումնասիրութիւնը ցոյց է տալիս, որ ջուրը մեր մոլորակի վրայ առաջացել է Երկրի ձեւաւորման աւելի ուշ փուլերում, քան նախկինում ենթադրւում էր: Այս բացայայտումը փոխում է պատկերացումները այն մասին, թէ երբ կարող էին առաջանալ կեանքի համար անհրաժեշտ պայմանները: Աշխատանքը հրապարակւել է Geochimica et Cosmochimica Acta (GCA) ամսագրում:

Ե՞րբ են Երկրի վրայ առաջացել կեանքի համար անհրաժեշտ պայմանները

Կեանքի առաջացման համար անհրաժեշտ են երեք հիմնական տարրեր.

-Ջուր

-Էներգիա

-Օրգանական միացութիւններ (CHNOPS՝ ածխածին, ջրածին, ազոտ, թթւածին, ֆոսֆոր եւ ծծումբ)

Ջրի յայտնւելու ժամանակը հասկանալը օգնում է պարզել, թէ երբ կարող էին առաջանալ առաջին կենդանի օրգանիզմները:

Ինչպէ՞ս են գիտնականները պարզել, թէ երբ է յայտնւել ջուրը

Հետազօտողների թիմը ուսումնասիրել է Երկրի ապարներում եւ մետեորիտներում մոլիբդենի իզոտոպային կազմը: Նրանք համեմատել են Արեգակնային համակարգի ներքին (չոր) եւ արտաքին (խոնաւ) մասերի մետեորիտները Երկրի տարբեր շրջանների ապարների նմուշների հետ:

Արդիւնքները ցոյց են տւել, որ Երկրի ապարների քիմիական կազմը աւելի մօտ է Արեգակնային համակարգի ներքին մասի մետեորիտներին, որոնք համարւում են աւելի չոր: Սա նշանակում է, որ ջրի զգալի քանակութիւն չի կարող Երկիր հասցւել Լուսնի ձեւաւորման պահին՝ մօտ 4.5 միլիարդ տարի առաջ:

Ուշ ակրեցիա եւ ջրի յայտնւելը

Հետազօտողները եզրակացրել են, որ ջուրը Երկրի վրայ յայտնւել է աւելի ուշ՝ ուշ ակրեցիայի ժամանակ, երբ մոլորակը ձեռք է բերել իր նիւթի վերջին 10-20%-ը:

«Մեր արդիւնքները ցոյց են տալիս, որ կեանքի համար անհրաժեշտ պայմանները ձեւաւորւել են աւելի ուշ, քան մենք կարծում էինք»,- յայտարարել է հետազօտութեան առաջատար հեղինակ Քեթրին Բերմինգհէմը:

Այս բացայայտումը փոխում է Երկրի վաղ պատմութեան մասին պատկերացումները եւ կարող է ազդել այլ մոլորակների վրայ կեանքի որոնման վրայ: Եթէ ջուրը Երկրի վրայ յայտնւել է աւելի ուշ, հնարաւոր է, որ նմանատիպ գործընթացներ տեղի են ունենում նաեւ այն էկզոմոլորակների վրայ, որոնք մենք ուսումնասիրում ենք այսօր: