Նռան մզւածքը նւազեցնում է տարեցների սրտի հիւանդութիւնների առաջացման վտանգը

Մանչեսթերի համալսարանի գիտնականները պարզել են, որ նռան մզւածքը (էքստրակտ) նւազեցնում է 55 տարեկանից բարձր մարդկանց արեան ճնշումը եւ բորբոքումն օրգանիզմում՝ պաշտպանելով նրանց սրտանօթային հիւանդութիւններից։ Հետազօտութեան արդիւնքները հրապարակւել են Nutrients բժշկագիտական  հանդէսում:

Հետազօտութեանը մասնակցել է 55-70 տարեկան 86 մարդ։ Կամաւորները չունէին աւելորդ քաշ կամ խրոնիկական հիւանդութիւններ: Փորձարկւողների միջին սիստոլիկ արեան ճնշումը եղել է 128 մմ սնդիկի սիւն: Գիտնականներն այս արժէքները բնութագրել են որպէս բարձրացւած, բայց հիպերտոնիկ դիապազոնին չհասնող ճնշում։

Առաջին փուլում հետազօտւողներն արեան նմուշներ են յանձնել լաբորատոր հետազօտութիւնների համար: Նրանցից ոմանք ցոյց են տւել օրգանզիմում բորբոքային մոլեկուլների (ինտերլէյկինների), տրիգլիցերիդների եւ խոլեստերինի մակարդակը, ինչը յայտնի է սրտի հիւանդութիւնների ռիսկի գործօններով:

Այնուհետեւ մասնակիցներին բաժանեցին երկու խմբի՝ ստանալու 12 շաբաթ նռան մզւածք եւ պլացեբօ (բուժական արժէք չունեցող որոշակի նիւթ կամ բուժման տեսակ), որը նման էր արտաքինով եւ համով:

Կրկնւող հետազօտութիւնները ցոյց են տւել, որ նռան մզւածքն արդիւնաւէտօրէն կանոնաւորում է արեան ճնշումը։ Միջին հաշւով, առաջին խմբում սիստոլիկ զարկերակային ճնշումը նւազել է 5,2 մմ սնդիկի սիւն։ Դիաստոլիկ արեան ճնշումը նւազել է մօտաւորապէս 3 մմ սնդիկի սիւն, թէեւ այս փոփոխութիւնը վիճակագրօրէն նշանակալից չէր։

Գիտնականների կարծիքով՝ այս ազդեցութիւնն առաջացրել են պոլիֆենոլները՝ նռան մէջ պարունակող հզօր բնական հակաօքսիդանտ նիւթերը։

Միաժամանակ առաջին խմբի մասնակիցների արեան մէջ բորբոքային ինտերլէյկինների (IL-6 եւ IL1-β) քանակի նւազում է գրանցւել, ինչը հետագայում նւազեցրել է սրտանոթային հիւանդութիւնների զարգացման վտանգը:

News.am