Reuters-ը հաստատել է Ուկրաինային Patriot նոր հակաօդային պաշտպանութեան համակարգերի մատակարարման մասին տւեալները

«ԱԼԻՔ» – Reuters գործակալութիւնը, վկայակոչելով տեղեկացւած աղբիւրին, գրում է, որ Ուկրաինայի դաշնակիցները քննարկում են Կիեւին լրացուցիչ «Patriot» հակաօդային պաշտպանութեան համակարգեր մատակարարելու հնարաւորութիւնը։

Ըստ Reuters-ի աղբիւրի՝ նման կայանքների պոտենցիալ մատակարարներ են դիտարկւում Միացեալ Նահանգները եւ Յունաստանը։

Արեւմտեան երկրները մտադիր են մատակարարումների վերաբերեալ համաձայնութեան գալ մինչեւ յունիսին անցկացւելիք ՆԱՏՕ-ի գագաթնաժողովը:

New York Times-ը կիրակի գրել է Ուկրաինա երկու նոր Patriot հրթիռների հնարաւոր մատակարարման մասին։ Պարբերականի աղբիւրները նշել են, որ Կիեւը կարող է ստանալ Իսրայէլում տեղակայւած Patriot-ը (վերանորոգումից յետոյ), իսկ արեւմտեան դաշնակիցները քննարկում են նաեւ Գերմանիայից կամ Յունաստանից մէկ այլ համակարգ տեղափոխելու լոգիստիկան։

Reuters-ը չի յայտնել, թէ կոնկրետ քանի սարքաւորում կարող է ստանալ Ուկրաինան։

Չնայած Ուկրաինան ներկայում ունի ութ Patriot հրթիռային համակարգ, դրանցից երկուսն, ըստ ամերիկացի պաշտօնեաներից մէկի, վերանորոգման փուլում են:

Ուկրաինան արեւմտեան դաշնակիցներին խնդրում է իրեն նոր հակաօդային պաշտպանութեան համակարգեր տրամադրել՝ իր քաղաքները ռուսական հրթիռային յարձակումներից պաշտպանելու համար։ Patriot համակարգերը յատկապէս արժէքաւոր են, քանի որ թեւաւոր եւ բալիստիկ հրթիռներ կարող են խոցել։