Գերմշակւած սնունդը փոխում է ուղեղի կառուցւածքը՝ առաջացնելով շատակերութիւն

Հետազօտութիւնները ցոյց են տւել, որ բարձր վերամշակւած սննդի մեծ քանակութեամբ օգտագործումը հանգեցնում է մի շարք հիւանդութիւնների, դրանց թւում՝ շաքարախտի, սրտանօթային եւ ուղեղանօթային հիւանդութիւնների, ինչպէս նաեւ դեմենցիայի։

Վերջերս անցկացւած միջազգային հետազօտութիւնը յայտնաբերել է խիստ վերամշակւած սննդի օգտագործման եւ ուղեղի կառուցւածքի փոխադրաձ կապը։

Հետազօտութիւնը կատարւել է Մեծ Բրիտանիայի կենսաբանկի տւեալների հիման վրայ եւ ընդգրկել է Մեծ Բրիտանիայի մօտ 30 հազար միջին տարիքի մարդկանց։ Այն անցկացրել է Հելսինկիի համալսարանի O’BRAIN լաբորատորիան, որը Մոնրէալի նեարդաբանական ինստիտուտի հետ համագործակցութեամբ ուսումնասիրում է ուղեղի եւ ճարպակալման փոխադարձ կապը։

Աշխատանքը հրապարակւել է npj Metabolic Health and Disease բժշկագիտական հանդէսում։

«Մեր արդիւնքները ցոյց են տալիս, որ խիստ վերամշակւած սննդի մեծ քանակութեամբ օգտագործումը կապւած է սննդային վարքագիծը կարգաւորող ուղեղի հատւածների, մասնաւորապէս՝ հիպոթալամուսի, նշակերպ մարմինը եւ աջ յարակից միջուկի կառուցւածքային փոփոխութիւնների հետ: Դա կարող է հանգեցնել չափից շատ ուտելու ցիկլի: Սակայն այդ կապը ամրապնդելու համար դեռեւս երկարաժամկէտ եւ փորձարարական հետազօտութիւններ են անհրաժեշտ»,- ասում է Հելսինկիի համալսարանի դոկտորանտ-հետազօտող Արսէն Կանիամիբւան:

Հետազօտութիւնը պարզել է, որ գերմշակւած սննդի եւ չափից շատ ուտելու միջեւ կապը չի կարող բացատրւել սոսկ դրա հետեւանքով առաջացող բորբոքմամբ կամ ճարպակալմամբ։ Ուղեղի փոփոխութիւնները կարող են բացատրւել նաեւ գերմշակւած սնունդ պատրաստելու համար օգտագործւող բաղադրիչներով, էմուլգատորներով եւ այլ յաւելումներով։ Կանիամիբւան ենթադրում է, որ բարձր վերամշակւած սննդամթերքի վնասակար ազդեցութեանը պէտք է աւելի մեծ ուշադրութիւն դարձնել ինչպէս անձնական սննդի ընտրութեան, այնպէս էլ սննդի կարգաւորման եւ սննդային քաղաքականութեան մէջ։ Սակայն նա նշում է, որ բոլոր վերամշակւած սննդամթերքներից չպէտք է խուսափել։

«Մասնաւորապէս, կարելի է խորհուրդ տալ վերամշակւած բուսական սնունդ, մասնաւորապէս՝ սառեցւած բանջարեղէն: Վերամշակման առաւելութիւնների մէկ այլ լաւ օրինակ է կաթի պաստերիզացումը»,-նշել է գիտնականը:

news.am