Նուշը նւազեցնում է արեան մէջ վատ խոլեստերինի մակարդակը

Ամէն օր նուշ ուտելը կարող է իջեցնել արեան մէջ «վատ» խոլեստերինի մակարդակը՝ նւազեցնելով սրտանօթային հիւանդութիւնների զարգացման ռիսկը: Այս եզրակացութեանն են հանգել Լինուս Փոլինգի ինստիտուտի եւ Օրեգոնի պետական համալսարանի Հանրային առողջութեան կոլէջի գիտնականները: Նրանց աշխատանքի արդիւնքները հրապարակւել են «Սննդի հետազօտութիւն» (NutriRes) ամսագրում:

Ուսումնասիրութեանը մասնակցել են նիւթափոխանակութեան համախտանիշով ախտորոշւած մեծահասակներ՝ վիճակ, որը բնութագրւում է որովայնի ճարպակալմամբ, բարձր արեան ճնշմամբ, արեան մէջ շաքարի բարձր մակարդակով, «լաւ» խոլեստերինի ցածր մակարդակով եւ տրիգլիցերիդների բարձր մակարդակով: Մասնակիցները բաժանւել են երկու խմբի. մէկը 12 շաբաթւայ ընթացքում օրական կերել է մօտ 45 նուշ (համարժէք է 320 կիլոկալորիայի), միւսը ստացել է նոյն քանակութեամբ կալորիաներ կրեկերների տեսքով:

Ընդամէնը չորս շաբաթ անց առաջին խմբի մասնակիցների մօտ գրանցւել է վիտամին E-ի մակարդակի աճ: Սա հզօր հակաօքսիդանտ է, որը օգնում է պաշտպանել բջիջները ազատ ռադիկալների (անկայուն մոլեկուլներ) վնասից: Բացի այդ, նուշ օգտագործող մասնակիցների մօտ նկատւել է ընդհանուր եւ «վատ» խոլեստերինի մակարդակի նւազում, որը կարող է առաջացնել վահանիկներ արեան անօթների պատերին: Բացի այդ, նշւել են աղիների վիճակի դրական փոփոխութիւններ եւ գօտկատեղի շրջագծի նւազում։

Գիտնականների կարծիքով, վիտամին E-ի անբաւարարութիւնը հանդիպում է շատ մարդկանց մօտ, եւ նուշի կանոնաւոր օգտագործումը կարող է օգնել լրացնել սննդակարգում այս բացը։ Ուսումնասիրութեան հեղինակները խորհուրդ են տալիս ընկոյզ ներառել հակացուցումներ չունեցող մարդկանց, յատկապէս սրտանօթային հիւանդութիւնների ռիսկի խմբում գտնւողների ամենօրեայ սննդակարգում։

 news.am