Կենդանական սպիտակուցի վնասակարութեան մասին միֆը ժխտւել է. հետազօտութիւնները ցոյց են տւել պաշտպանիչ ազդեցութիւն

Կենդանական ծագման մթերքների օգտագործումը չի աւելացնում վաղաժամ մահւան ռիսկը եւ կարող է պաշտպանական ազդեցութիւն ունենալ քաղցկեղի դէմ, այս մասին ցոյց է տւել խոշոր NHANES III նախագծի շրջանակում իրականացւած հետազօտութիւնը։ Արդիւնքները հրապարակւել են Applied Physiology, Nutrition, and Metabolism (APNM) ամսագրում։

Գիտնականները վերլուծել են գրեթէ 16,000 մեծահասակների տւեալներ եւ պարզել, որ ո՛չ կենդանական, ո՛չ էլ բուսական սպիտակուցը չեն մեծացնում ընդհանուր մահացութիւնը: Աւելին, նրանք, ովքեր իրենց սննդակարգում աւելի յաճախ են ներառել կենդանական ծագման մթերքներ, վիճակագրօրէն քաղցկեղից մահանալու աւելի ցածր հաւանականութիւն են ունեցել:

Վերլուծութեան ճշգրտութեան համար հետազօտողները օգտագործել են NCI եւ MCMC մոդելներ, որոնք հաշւի են առնում սննդակարգի օրական տատանումները եւ սնման երկարաժամկէտ սովորութիւնները: Հեղինակները շեշտում են, որ դիտողական ուսումնասիրութիւնները չեն ապացուցում ուղղակի պատճառահետեւանքային կապ, սակայն դրանց արդիւնքները՝ տասնամեակների կլինիկական տւեալների հետ միասին, հաստատում են, որ ցանկացած ծագման սպիտակուց կարող է լինել առողջ սննդակարգի մաս, որն աջակցում է երկարակեցութեանը։

News.am