Գիտնականները ցաւը կասեցնելու միջոց են գտել՝ առանց ապաքինման գործընթացը դանդաղեցնելու

Նիւ Եօրքի համալսարանին առընթեր ցաւի հետազօտական կենտրոնի հետազօտողներն առաջին անգամ ցոյց են տւել, որ տարբեր պրոստագլանդինային ընկալիչներ պատասխանատու են ցաւի եւ բորբոքման համար առանձին-առանձին: Այս նոր յայտնագործութիւնը կարող է յանգեցնել ցաւազրկողների մշակմանը, որոնք չեն դանդաղեցնում ապաքինման գործընթացը,- գրում է Nature Communications-ը:

Պրոստագլանդինները վնասւածքի կամ վարակի ժամանակ արտազատւող հորմոնանման նիւթեր են: Դրանք միաժամանակ ցաւ են առաջացնում եւ բորբոքում գործի դնում: Գոյութիւն ունեցող ցաւազրկողների մեծ մասը, մասնաւորապէս՝ իբուպրոֆենը կամ ասպիրինը, նւազեցնում են պրոստագլանդինի մակարդակը՝ կասեցնելով երկու գործընթացներն էլ: Արդիւնքում, ապաքինումը յետաձգւում է:

«Բորբոքումն ու ցաւը սովորաբար ընթանում են ձեռք-ձեռքի տւած, բայց ցաւը կասեցնելու ունակութիւնը՝ առանց բորբոքմանը խանգարելու, կարեւոր քայլ է դէպի բուժման նոր եղանակներ»,- նշել է հետազօտութեան համահեղինակ Նայջել Բանեթը:

Գիտնականների խումբը կենտրոնացել է չորս տարբեր ընկալիչների հետ փոխազդող պրոստագլանդին E2-ի (PGE2) վրայ: Նախկինում EP4 ընկալիչը համարւում էր ցաւի բանալին: Սակայն նոր փորձերը ցոյց են տւել, որ EP2 ընկալիչը կարեւոր դեր է խաղում:

Շւանի բջիջներում, որոնք շրջապատում են նեարդերը ուղեղից դուրս, EP2-ի արգելափակումը լիովին վերացրել է մկների ցաւային արձագանքները՝ ընդ որում բորբոքումը կանոնաւոր ընթանում էր: «Ի զարմանս մեզ, EP2-ի արգելափակումը վերացրել է ցաւը, բայց բորբոքումը շարունակւել է: Մենք արդիւնաւէտօրէն անջատեցինք այս գործընթացները»,- յաւելել է հետազօտութեան համահեղինակ Պիերանջելօ Ջեպետտին Ֆլորենցիայի համալսարանից:

Մարդու բջիջների վրայ կատարւած փորձերը հաստատել են արդիւնքները. EP2-ի գործարկումն ակտիւացրել է ազդանշանային ուղիներ, որոնք պահպանում են ցաւը, բայց չեն ազդում բորբոքման վրայ: Դա EP2 ընկալիչը նոր, անվտանգ ցաւազրկողների մշակման համար հեռանկարային թիրախ է դարձնում:

News.am